彩虹有住迷人魔力，唔單單係七彩顏色對眼球嘅衝擊，仲因為佢蘊含住希望、包容同滿滿嘅愛，呢份愛無分國界、種族、性別、貧富，甚至唔侷限於人同人之間......以下介紹嘅神秘彩虹國度，每個都有屬於自己嘅大愛故事。
美國－Salvation Mountain ｜ 窮一生傳頌愛
呢個齋睇相已經令大家心動加尖叫嘅七彩山谷，係位於美國Niland小鎮嘅Salvation Mountain。佢係當地一位已故虔誠基督老人Leonard Knight自發嘅行為藝術，Knight花咗近30年時間用油漆顏料、聖經詩句同大自然主題畫作，打造出極具個人風格同特色嘅戶外大型藝術品，佢認為愛無處不在，希望透過Salvation Mountain去做傳頌愛，令世界變得更美好。呢份窩心嘅愛，唔單只吸引全球旅客去瘋狂朝聖，連英國樂隊ColdPlay同當地時裝雜誌都去過拍攝呀！
 |
 |
 |
美國－Seven Magic Mountains ｜ 人與自然的親密關係
成日睇片見到有人喺水中砌平衡石，感覺真係好治療，無諗過呢個idea竟然仲可以變成大型戶外展品！瑞士藝術家Ugo Rondinone將7座超過30呎高、共重約25噸嘅七彩平衡石，帶到美國拉斯維加斯近郊一個沙漠進行展覧，希望喚起大眾對人類發展同大自然生態平衡嘅關注。官方表示展覽為期兩年，預計到下年5月咋，要去趁早。
 |
 |
 |
中國－張掖丹霞地貌 ｜ 打翻了的調色盤
被旅人形容為「超不真實」、「似小孩打翻了調色盤」嘅張掖丹霞地貌，看似遠在天邊，其實近在中國甘肅省境內！呢個發育於200萬年前、渾然天成嘅天然七彩絕景，最先由一位普通農民發現，佢由2004年開始修路、建觀景台、路牌，後期甚至起咗間家庭旅館，接待嚟觀光嘅旅客，終於等到2008年政府決定進行開發，終於令呢片彩色丘陵由隐於深山不為人知，到成為絲綢之路上聞名海外嘅國家地質公園，連張藝謀、姜文嘅電影都嚟過呢度取景，仲畀被美國《國家地理》雜誌評為「世界十大神奇地理奇觀」。
 |
 |
 |
巴西－Favela Painting ｜ 貧民窟的一抹彩虹
正所謂「人窮志不窮」，即使唔係大富大貴，一樣可以活得精彩！巴西里約熱內盧嘅貧民區Vila Cruzeiro，就擁有一件總長7,000公尺嘅巨型彩繪作品－「Favela Painting(平民窟彩繪)」，由荷蘭街頭藝術家Jeroen Koolhaas同Dre Urhahn花咗一整個月時間創作，動用咗34間民宅，將原本唔起眼嘅貧民區變成當地最colorful、最受歡迎嘅人氣地標，更為居民帶嚟學習、就業機會同收入，超有愛呀！
 |
 |
 |
台灣－彩虹眷村 ｜ 彩虹爺爺的兒時回憶
位於台中嘅彩虹眷村，香港人應該唔陌生，原來咁靚嘅畫作背後，同樣有動人故事。年過90歲嘅老榮民黃永阜，面對眷村老房子即將被拆卸，引發起思鄉情懷，同時希望留低兒時回憶，於是拎起油漆掃，開展咗佢嘅彩繪人生。佢花咗4年時間，由屋內畫到屋外，由牆上畫到地板，從無間斷過，佢嘅創作感動咗唔少人，同時對保留眷村文化有極大貢獻。
 |
 |
 |
