ViuTV開台，我最鍾意嘅節目唔係《綠豆》，其實係《SE7EN》。7個後生仔，齊齊做啲你可能諗過但又唔敢做嘅嘢，例如去晒全香港嘅離島、用紙製船渡海、要跑得快過架火車。最好係佢哋最後一集，齊齊挑戰垃圾灣，要清走沙灘上數以噸計嘅垃圾，玩得嚟都可以好有意義。
《SE7EN》Season 2，無咗我私心好喜歡嘅朱鑑然，但多咗運動健將Hidy Yu （余曉彤），結果佢哋挑戰全面升級！單係參加毅行者已經聽到都驚，行足100公里山喎，Renci參加「Red Bull飛行日」更出意外導致短暫失憶，嚇到其他人個心離一離。「其實佢撞到今日都未好返，傻下傻下咁，哈哈哈哈哈～」佢哋做節目做訪問雖然成日互串互窒，例如搞Red Bull飛行日隻飛機，就因為設計師阿妹嘅執著而嗌交，但7人暗地肯定好好感情，好多嘢係真朋友先夠膽講出口。
今個season最想睇SE7EN挑戰毅行者，同時替佢哋擔心，因為甚有玩命feel。本來Hailey有份受訓，見佢行到叫晒救命，仲要俾人拖上山頂咁濟，最終出賽隊員變成Hidy、Thor、黃奕晨及外援跑手梁諾妍（Inez）。「拍毅行者係我哋7個唯一一次無嗌交。」跑嘅當然辛苦，其他人做back up team一樣好忙：喺每個休息點作好準備，幫各位跑手按摩、換衫、換補給，「嘩，啲襪濕晒㗎，我哋都幫佢哋除呀！」仲有子豐uncle隨時候命煮嘢食，熱食源源不絕奉上，Hidy等人話自己好似去咗酒店咁，點餐要乜有乜，結果每次話休息15分鐘，都變成休息成個鐘。
跑到咁辛苦，仲以為成日俾人話好煩好多嘢講嘅黃奕晨，會攰到無聲出，點知……「佢仲係好煩好多嘢講，呢個成為大家跑得快啲嘅動力，我哋唔想再聽啦！」至於一向口賤嘅Thor，子豐uncle好大聲講咗句，「見佢行到死狗咁出唔到聲，心到涼埋！哈哈哈哈！」其實佢休息時都仲有串兩句咀，不過體貼嘅阿妹話大家見佢咁辛苦，都由得佢任串唔嬲。 
呢個時候黃奕晨話除咗辛苦，佢哋跑到一個水塘位仲撞鬼，「嗰度好多樹，有工作人員係咁哪叫我哋唔好坐，唔好休息。後來佢哋講返，有人見到有女人吊喺啲樹度，但我睇唔到，聽講話撞過鬼嘅藝人會紅，咁……」大家當然群起搭咀（主要梗係窒佢），然後又講到佢哋拉飛機嗰個挑戰，「最後好易拉，我哋拉到好似放狗咁輕鬆，架機好似沖埋嚟咁，幾驚佢最後起飛呀。」之後佢哋又逼黃奕晨show佢背脊俾我睇，有咩特別？原來之前佢哋挑戰渡海泳，有人喺佢背脊寫咗「夏雨之子」幾個字，結果曬到有印，哈哈哈哈。我真係好鍾意佢哋咁無聊同誇張，逢星期六，9:30至10:30，記得睇實viuTV《SE7EN》。
