猿人電影系列由1968年起，已經拍到第8套，最新一集《猿人爭霸戰：猩凶崛起》（Dawn of the Planet of the Apes）承接2011年的《猿人爭霸戰：猩凶革命》（Rise of the Planet of the Apes），講人類俾「猴流感」搞到就快滅絕，反而猩猩就開枝散葉，於是憤怒嘅人類就大大聲話要殺晒啲猿人，絕對唔會原諒啲猩猩咁話，但最後……最後就係猿人電影系列仲有下集，2016年上。有啲猩我們應該同佢和平公處，有啲呢，你走吧啦。（現已上映）
猩猩成家立室
今次《猿人爭霸戰：猩凶崛起》2011年上映前作的《猿人爭霸戰：猩凶革命》（Rise of the Planet of the Apes）有關，所以點都要講少少返故事背景先：上集講到，喺森林生活嘅野猩猩Caesar，俾人類捉咗返實驗室做動物實驗，後來佢竟然意外地變成超高智慧嘅猩猩，仲同同類勇武抗爭搞革命，結局係佢哋留守山林，同人類（暫時）和平地share三藩市。3年之後又點呢？今集故事就講大量人類因為一種名叫「猴流感」（Simian Flu）嘅致命病毒死亡，幾乎滅絕，猩猩當然俾人話係病毒源頭，但事實明明係人類自己喺實驗室整出嚟㗎嘛！而Caesar帶領嘅猿人一類反而日益壯大，佢仲成家立室有埋細路，有日猩猩竟在森林遇上人類，於是就開始地球爭奪戰。
「猴流感」滅絕人類
今集《猩凶崛起》，比起上集的時空其實已經推進了十年，主角也由靚仔James Franco變成Jason Clarke（不過James Franco都會在其中一幕出現），雖然養眼程度大跌但演技搭夠，佢演嘅人類角色叫Malcolm，建築師一名，老婆因感染「猴流感」死亡，只得後生仔仔同佢相依為命。編劇其實寫到Caesar同Malcolm個角色好似兩面鏡咁，大家都係為咗下一代努力，但偏偏呢個時候由Gary Oldman飾演的人類領袖Dreyfus出場，佢主張殺晒所有猿人，奪回地球，兼且要幫佢老婆同兩個仔報仇！喺預告片中，會見到佢對猿人係咁開火，總之就要趕盡殺絕！不過猿人經過十年時間，已經慢慢發展出更多智慧，佢哋似乎除咗身體攻擊，仲識用槍，照咁睇人類似乎玩完機會大啲喎。
唔要綠幕
今集嘅猿人領袖Caesar，依然由曾經喺《魔戒三部曲》扮演咕嚕（Gollum）嘅英國演員Andy Serkis扮演，今集佢做咗人老公同爸爸，更識得騎馬，而全個猿人族群經過十年進化，又會開始學習文字同講嘢，變得愈來愈醒目，而且亦更人強馬壯，起碼有2,000隻猿人！為咗令猿人生活更真實，拍過《末世凶煞》（Cloverfield）的導演Matt Reeves請了50多位演員，扮猿人喺森林活動，佢最終目的係要令觀眾唔知戲中有冇用到真猩猩，咁就為之very good嘞！而森林地區嘅景色，導演就話最好要真，唔要咁多綠幕，所以有85%都係喺溫哥華同新奧爾良外圍嘅森林拍攝，連啲勁大型3D拍攝機，都長途跋涉搬入森林，幸好演員們都話回歸實景好好feel，做戲仲投入過拍綠幕，不過就辛苦晒工作人員。
拍完再拍
猿人系列第一套電影，喺1968年登生，名為《Planet of the Apes》，直到2014年上映呢套，前前後後已經拍咗8套，特效上要超越前作唔難，反而故事先至重要。其實6月28日時，《猿人爭霸戰：猩凶崛起》就成為咗俄羅斯莫斯科影展嘅閉幕電影，睇過嘅人幾乎都俾好評，Rotten Tomatoes網站有93%正評，Metacritic上更高達91分，有唔少影評人話劇本好人性化，兩個鐘嘅時間導演Matt Reeves而處理得完全唔悶。電影公司似乎一早已經對Matt好滿意，早在今年1月已經公布會再開拍下一集，Matt Reeves唔止會再做導演，仲會做埋劇本，暫定2016年7月26日上映，應該依家要開始拍㗎啦喎。
text | iris
