星期六日冇乜嘢做，有時都會諗起西九「自由約」。但原來今個年度嘅「自由約」做埋今個星期六日就完喇！壓軸登場嘅自由約，一連兩天呈獻一系列涵蓋音樂、文學、親子、寵物、市集、劇場、粵劇同植物等精彩元素嘅「狂野」節目，再下一季「自由約」，就要等到9月喇！
三月份嘅主題，就係「狂野」嘅「野」！音樂方面搵嚟觸執毛、音樂人蔡世豪 x 曾皿堅 x 黃靖 x Andy is typing...、迷幻電子樂隊Blood Wine or Honey、Project Ace、美國音樂才女Kaya Doran等等，周六舞台拼發音樂火花。周日就請來台灣Punk Rock樂團八十八顆芭樂籽壓軸演出，仲有來自五湖四海嘅Shotgun Politics、數學搖滾組合Eat Sleep Recycle、青春佻皮組合小紅帽，同埋結他手Jason Kui等！
一動不如一靜，文學方面，香港文學館將會以苗圃公園內嘅植物舉辦「文學藍曬工作坊」，仲會以今季七首每月一詩，創作一系列精美文學扭蛋。文學占卜師就會以「一句到尾」詩占卜為大家預測狗年運勢。
另一方面，今次「自由約」增添戲曲元素，舉辦「粵劇策騎大踏步」工作坊，大家可以即場學習粵劇舞台身段。其他活動包括保護遺棄動物協會舉辦嘅「與汪星人Speed Dating」、麥子啤酒嘅「精釀啤酒學堂──大師班」、「海角地攤 2046」手作市集、「Market ++」Pop-up store等。
特別一提，本地手工啤酒品牌「麥子」，喺過去幾個月「自由約」以「代表香港人口味的啤酒」為題收集觀眾意見，終於喺今次推出全新嘅「自由約」手工啤酒，千祈唔好錯過！
西九「自由約」
日期：3月10日至11日（星期六及日）
地點：西九文化區苗圃公園
網頁：https://www.westkowloon.hk/tc/freespacehappening
查詢：2200 0011
