聖誕同光棍節一樣，其實只係畀大家有個合理原因消費一下，所以晨咁早就減價或出新系列，一啲都唔出奇。就好似Starbucks經已出咗一大堆飲飲食食嘅全新系列，最吸引係「迷你布甸杯」，之前喺全球好多地區推出之後大受好評，而家第一次來到香港，原來食完仲可以用嚟種菜，將布甸杯變成小盆栽。
今年Starbucks以「Reimagine．Reuse」為主題，鼓勵大家用創意Reuse同Recycle食物包裝，Upcycling改造為精緻手作。「迷你布甸杯」絕對係最佳例子，首度喺香港登場，有朱古力同焦糖雲呢拿兩款口味，一黑一白布甸杯包裝，黑白配之餘，跟手仲推出埋「星巴克種植套裝」，希望大家食完布甸之後保留包裝，用種植套裝將布甸杯變成小盆栽。
隨套裝附送，集齊種植器、種籽、培植椰土、小盆栽插牌、小鏟子、手巾、芝麻菜或者三葉草，悉心照料盆栽7至10日，就種出可食用嘅迷你菜，咁聖誕咪可以食番自己嘅「農作物」囉！
兩款迷你布甸杯即日起全線香港Starbucks分店推出，種植套裝喺22號先有得賣，買迷你布甸杯換購種植套裝可享優惠，環保下啦香港人。
