如果可以問張孝全借種，我怕條隊會由香港排到去美國！鄭秀文Sammi 就有呢個機會嘞，不過係喺戲入面。兩人合演嘅《合約男女》，就係講公司高層Sammi想搵個壯男借種，結果好識貨地搵咗張孝全，但二人火星撞地球，最後會點？咪就係男人版嘅《霸道總裁愛上我》。
張生出名贛直，今次要做喜劇，其實都有少少難度，特別係有場喺更衣室自己跳豔舞，睇到人嘩嘩聲，心諗：「張孝全好放喎。」點知一問之下，「我開頭完全放唔開。」要佢自己一個心花怒放跳豔舞，又真係難咗少少，本來導演由佢自由發揮，但經過好多次之後，變成要做指定動作。「嗰場真係好尷尬……」不過成果證明係唔錯，孝全可以再放啲喎。
至於Sammi，好耐之前已經有人叫佢做愛情片天后，不過今次就係佢第一次演姐弟戀，「同埋我喺電影世界好少演好強嘅角色，以前多數都係俾華仔蝦㗎嘛。」Sammi話今次其實似佢唱歌嘅角色，一個女強人點面對自己嘅愛情，仲要有少少強逼症同潔癖！「個角色好鍾意乾淨，我平時都有啲位係咁㗎，例如入屋對鞋喺某個位置就要除。不過我又唔會逼另一半做嘅，哈哈。」自言平日係傳統小女人，屋企大部嘢都係老公話事，「工作上已經有好多自己主張同睇法，返到屋企梗係要lay back。」
但戲中個角色好誇張，對生活要求乜都高，要好要精緻要整齊，連借種個男人食乜著乜都要理。講到借種，其實好少電影會講到呢種題材，Sammi個人雖然無打算借種，但明白對於好多不孕嘅朋友，呢個可能係解決問題嘅辦法。至於孝全，大家聽住啦：「借種唔係咩壞事，如果係朋友要求，我了解咗佢嘅需要同狀況，都有可能會做呢件事。」嗱！大家可以少啲幻想，因為首先你要同孝全做朋友先，入場睇戲FF下就可以。（《合約男女》現正上映中）
