近來TVB星期日晚上11點有個恐佈節目叫《請勿關燈》，仲以為係大台自己拍，點知原來係外購劇，恐佈短片全部來自大陸驚慄網劇《慎點》（仲要疑似抄襲日本漫畫橋段）。
老老實實，氣氛係幾好，但我都係鍾意TVB以前啲自家制恐佈節目多啲，例如《奇幻潮》、《幻海奇情》，「四人歸西」真係影響萬千雀友，今時今日睇都仲驚驚地！
《迷離世界》1981年，7集
每集一個故事，有人問米被鬼迷、有人要對付被鬼附身的洋娃娃、有人墓地遇上「自己」、有人在片場遇撞鬼、有二奶突然搵大婆講數，話要揭穿男人真面目，點知……無咩特技，但氣氛取勝，其實影住啲公仔加以前啲低清畫面已令人十分驚。有呂良偉、許紹雄、石修等人演出，而且myTV竟然有得睇！
《幻海奇情》7、80年代，54集
最出名一定係《四人歸西》，打牌唔可以四家一齊打西（再搭隻一筒）！其實呢個短劇出自《歡樂今宵》內一個環節《夜驚魂》，《幻海奇情》係另一套由陳欣健主持的獨立靈異短劇，不過兩輯節目部份故事（加埋上面提過的《迷離世界》）曾夾埋一齊推出《幻海奇情》VCD（正版已絕版，但淘寶有好多，well...），所以已經不分你我。
54集，每集十分鐘，推介發哥演出的《死之境界》，個新娘嚇得我呢；《八小時》的葉德孄帶仔女搬新屋，撞鬼倒數8小時，是舊版恐佈《24》；廖啟智主演的《車禍》，一家三口因車禍離世，結果在路邊搵替身。其實《幻海奇情》珍貴在多巨星演出，而且沒有特技，純玩創意同氣氛，故事恐佈又帶點警世，是不少人的童年陰影。
《極度空靈》1992年，13集
又係單元劇，08年曾經重播，我當日最記得係：「點解吳剛會做靈異節目主持嘅喂？」而且演員陣容都幾勁，有鬼王鬼后雷宇揚同羅蘭，又有鄭伊健、林家棟、羅嘉良、吳岱融、蔡少芬、陶大宇。印象中最恐佈係《相中人》，講攝影發燒友雷宇揚，有次在山邊貪心拿了一對情侶的古董相機，裡面的菲林更紀錄了二人失足墮崖情況，最後……而撈家羅嘉良嗰集《魔》，一人演出雙種性格，做阿媽又做阿仔，雖然似希治閣套《觸目驚心》，但演出吸引。《極》不是集集都講鬼，驚青人士可以揀嚟睇。
《奇幻潮》2005年，22集
由鄭伊健同羅敏莊，是8、90後的集體驚嚇回憶，仲有不少當年的年青偶像演出，包括Shine、2R、楊愛瑾、傅穎、Yumiko、梁洛施、李逸朗、蔣雅文、官恩娜、吳浩康、陳文媛、吳日言、李蘊等等。其中《四人再歸西》將《四人歸西》變成網上麻雀，雖然唔恐佈但我鍾意佢哋做人識進步。
另外《羨慕死人》講一個女仔真係羨慕一個死人，結果被女鬼慢慢取代身份；《重生校園》講校長幫父母複製又乖又叻嘅仔女，怪獸家長係咪都想試下？；家燕媽媽於《媽媽愛你四小時》因愛錫仔女而感動到勾魂使者，睇到人眼濕濕；《七彩天晶》麥包個仔頭上插住支竹慢慢行返屋企。最多人記得一定係《情比金堅》，4個人去鬼屋採險，每入一間房都有一關要過，例如滴血、切手指，結果……大個睇返先知其實係左抄右抄，不過我仍然覺得好睇，我是垃圾I am sorry！
額外推介：ATV《夜琉璃》
已收皮的永恆A記（好矛盾）版本的《幻海奇情》，80年代拍攝，網友話因為ATV無錢製作，所以更low-tech更惡佈。有大約50集，10分鐘一集，網上目前有不少方法觀看，自己搵搵啦！
