全球迪士尼樂園首個漫威主題遊樂設施「鐵甲奇俠飛行之旅」，1月11日已經正式於香港迪士尼樂園開幕，當日Iron Man都有嚟香港出席開幕禮！除咗坐上可以同Iron Man一齊喺香港上空飛嘅「鐵甲號」Mark VIII飛行車，到底仲有咩睇有咩玩？有咩係一定要買？Mark實以下幾點，千萬唔好miss！
點先可以親身同鐵甲奇俠會面？
除咗玩「鐵甲奇俠飛行之旅」，園區內仲有4個展廳等大家了解多啲史達工業嘅技術，而點先見到「鐵甲奇俠」？事實上佢有時間就會嚟「史達工業呈獻：鐵甲奇俠裝備展」，可能你睇睇下Iron Man啲裝備，佢突然就會現身同你Say hi合照。
香港迪士尼樂園獨家商品
「史達科技旗艦店」除咗有超過250款漫威主題商品，仲有超過70款香港迪士尼樂獨家嘅「鐵甲奇俠」商品！香港迪士尼樂園商品營運綜合策劃經理陳偉賢特別推介男fans買限量300隻嘅Iron Man Stark Expo手錶（價錢：$1,380），金黑配色十分有型。另外香港迪士尼樂園限定的Iron Man Collectible Figure做工細緻，好值得入手（價錢：$1,198）。衫方面都有好嘢，例如場內好多賓客都搶購嘅深藍色 Stark Expo外套（價錢：$168），仲有限量版「鐵甲奇俠」主題徽章（價錢：$198），手快有手慢無。
食乜好？
Iron Man食乜要Jarvis先知，但我哋就可以食Iron Man（個樣）落肚，包括英雄漢堡套餐（價錢：$109），同埋一定要一定要一定要叫嘅鐵甲奇俠立體杯（港幣$88），飲完可以拎返屋企做裝飾，極抵。行過戶外小食亭，仲可以買以Iron Man頭盔為造型嘅超級英雄窩夫餠（港幣$50）醫肚。
可以同鐵甲奇俠一齊住！
玩完一日都唔夠喉？想夜晚都見到Iron Man？由即日起至6月30日，入住香港迪士尼樂園酒店及迪士尼好萊塢酒店嘅賓客只需另加港幣$600，就可以享用「鐵甲奇俠」主題酒店房間佈置！包括「鐵甲奇俠」主題床旗佈置、拖鞋、特色門貼、鏡面裝飾，仲有鐵甲奇俠Macaroon歡迎你，不過記得需要至少3日前預訂。
