餓咗好耐喇！朝偉終於肯再搞笑，於即將上畫嘅《擺渡人》中，重拾佢嘅喜劇細胞。影帝就是全能，你要佢扮醜扮騎呢得，要佢型住搞gag又得。就連Eason都話最記得偉仔嘅搞笑角色就係韋小寶同《風塵三俠》。至於我個人心水，就梗係《射鵰英雄傳之東成西就》經典孖潤腸啦，仲有感動又好笑嘅《天下無雙》李一龍。你又最鍾意邊個喜劇角色？以下就同大家嚴選幾個，一齊重拾偉仔的笑容。
唔係唔鍾意周慕雲，但能夠睇番呢個輕輕鬆鬆嘅偉仔，真係幾開心。呢張來自《擺渡人》嘅造型，第二個擺唔笑，係偉仔擺先收貨！
《亞飛與亞基》
同學友做「飛基雙煞」，佢兩個係次次都剋死大佬嘅古惑仔，膽小無用，最後被湯鎮業飾演嘅大佬「關公」收留，要證明佢夠命硬。呢幕Marker紋身去雪房收數，好笑到震。
《射鵰英雄傳之東成西就》
為救《東邪西毒》超支而拍，惡搞《射鵰英雄傳》，朝偉歐陽鋒想殺張學友飾演嘅洪七公，但殺極都殺唔到嗰段最好笑。最爆係同小二要籠臘腸卷，小二神回︰「你咪食緊囉！你食得晒呀？」
《風塵三俠》
梁家輝、梁朝偉、鄭丹瑞合演嘅都市愛情輕鬆喜劇，朝偉做平凡打工仔，在未婚妻與夜場PR中周旋，戲中三位主角會戴頭套扮自己角色嘅小Dee Dee，難怪Eason都話好笑。
《正牌韋小寶之奉旨溝女》
電視劇以外再一次做韋小寶，由古代穿越到93年香港，仲識到張衛健，又有葉玉卿飾演嘅建寧公主帶齊姐妹嚟香港搵老公。呢下舔避孕套個袋，又係一絕。
《超時空要愛》
呢套戲評價兩極，又係穿梭時空，警察朝偉回到三國做諸葛亮，佢仲愛上韓國女星趙銀淑做嘅呂蒙。朝偉做得好過《赤壁》周瑜。
《東京攻略》
2000年賀歲片，朝偉做私家偵探（實際上係日本特工）林貴仁，有型地幽默，又非常姿整，打完交會嫌人哋整亂佢個頭。同片有靚到爆炸嘅張柏芝，仲有阿部寬同柴咲幸，但當年柴咲幸只係做朝偉其中一個女助手Yumi！續集《韓城攻略》無咩印象。嚟緊會拍《歐洲攻略》，唔……
《天下無雙》
劉鎮偉繼《超時空要愛》後再借山賊朝偉講愛無分性別階級，古代影快相機唔錯，公主王菲都做得搞笑㗎。
《行運超人》
偉仔做風水學家賴料布，要幫千嬅葉孤紅化解衰運，朝偉戲中對手鄭中基同杜汶澤，兩位啲造型非常出色，基哥亦因為呢套戲晉身笑匠。
