人人善有善報
如果你能夠識得將條題唱出嚟，咁你都真係好old age喇。係呀，今晚又係一年一度嘅《歡樂滿東華》。其實細個對台慶同東華係有啲混亂，因為兩個節目都係年尾做，都係搵班藝人嚟較飛，但對東華印象最深就係通宵。
通宵這回事對小朋友嚟講係大事，係成長標記，年三十晚可以夜啲瞓，東華當晚都可以夜啲瞓，所以東華同年三十晚喺我心目中都係咁重要。
不過通宵係要捱嘅，深夜時段往往係歌手表演環節，係想睇，可惜最難捱一關往往係晚間新聞前後播出嘅粵劇時段，動軏都半粒鐘，能戰勝的沒幾回。
長大後，當然唔再鍾意睇東華啦，但仍然會為佢留守到深宵，為嘅係「卡拉之星」。呢個可謂《星夢傳奇》嘅前身，即係由一班藝員同事自行籌集善款，數字夠打入十大就可以俾你唱一首歌。對於一眾寂寂無名嘅甘草藝員，可以獨佔一號機3分鐘，又真係好吸引。
節目好睇之處係令你長知識，一眾平時熟口熟面嘅藝員，只會記得佢係邊套劇強姦咗邊個、佢就專做八婆角色、佢又點點點，但呢刻你可以清清楚楚見到佢哋嘅名字︰王俊棠、王維德、李鴻傑、曾建明，個個都放低角色包袱，認認真真地
唱首歌，甚至排埋舞，最最最有心機係王維德，年年都抽半首歌時間邊唱邊做手語，堪稱藝人之典範。
只係凡係好嘢都冇得保留，近年卡拉之星已改制，改為一班年輕藝人歌手去唱，完全唔係嗰回事囉！
（Pat爺）
曾健明專做一啲搵人着數嘅街坊，至於歌藝，都係咁上下啦。
李鴻杰，多演歹角，最狼一次係演孌童癖，但真人係「戀舞」，次次出場都跳晒tango拉丁，事源他曾是舞蹈員及80年代的排舞老師。
王維德，強項係扮劉華，更強項係手語唱歌，少啲愛心都做唔到。
______________________
潘忠明成日講：「因為XXX經過嚴格訓練、屋企嘅小朋友大朋友千祈唔好學。」
潘忠明喎，係人都知又係講舊時，一年一度馬拉松式籌款共襄善舉，《歡樂滿東華》睇吳剛師傅，是90年代的集體回憶。
早排睇新聞講吳剛師傅依家從商，又搞婚姻又搞煌府婚宴專門店又盛，頭髮蓬鬆的他，早喺8、90年代已是「無記」出晒名的筋肉人，每年《東華》玩亡名表演籌款，一定唔少得佢。我睇《東華》，除了睇「卡拉之星」睇王維德邊手語邊唱〈童話〉嗰part，就只係期待睇阿吳剛師傅標童上身。
心口碎大石、搽油、飲滾油、食炭等氣硬功全台係得吳剛師傅先夠膽死，招牌動作標童上身，雖然今時今日我仲係懷疑緊個真實性，但聽訪問講話吳剛師傅隨時準備回歸無記食炭，我諗食碳呢part應該都係堅啩。
另外比較有印象的E組難度動作，應該係90年代智叔有樣學樣於92年玩喉嚨頂纓槍頭推車，驚嚇程度一定驚過吳師傅搽油，不過，有吳剛師傅在旁教路，智叔又點會失威呢，結果咪同吳剛一樣成為《東華》代表作。
講起代表作喎，當年（06年）Yumiko表演空中飛人俾錢嘉樂扯甩褲露出T-back那經典一幕，其實都係嚟自《東華》，冇記性！
（BUT）
呢一幕，仲記得志偉問係咪有slow motion睇。
玩滾油，知情者話其實油唔滾炭唔熱，化學玩意，唔知堅定流。
智叔呢一幕，唔知佢自己仲記唔記得。
