有樣嘢一定要幫黑仔姜皓文同大家講聲，他現在不是亞視藝員，而且已經離開ATV兩年了！因為我見網上討論區每次講起黑仔，例如之前他跟吳君如到TVB上李思捷個talk show《今晚睇李》宣傳新戲《12金鴨》，有人都仲會留言問，「黑仔唔係亞視人咩？」喂唔係啦，他現在是電影人，而且是超多產的電影人，在維基百科上的「姜皓文」page，電影一欄，2015年他有份演出的多達10套。黑仔皮膚真係好黑，但見到他的一刻，覺得他有神采到發出閃閃金光,，他謙稱自己未算成功，但我覺得他已在迎上第一個高峰。
演技源自經歷
黑仔好戲是不容置疑的事實，由爛仔到富豪，他都演得揮灑自如，或者他的多變跟個人經歷有關。婆婆是馬來西亞華僑，外公是馬拉人，所以黑仔皮膚天生已黑黑實實，細細就俾同學仔笑他是印度人，「當時麗的有套劇叫《奇女子》，他們就叫我『印度奇女子，一包四毫子』，哈哈。」。生父早在他出世之前已跟媽媽分開，後來母親改嫁，可惜他14歲時媽媽因病離世，他被送去荷蘭宿舍（為缺乏家庭照顧的男性青少提供住宿服務的地方）。當時黑仔高高瘦瘦，一頭曲髮，又好在他無學壞，還常常偷走出去酒樓賣點心，「一日人工30蚊。」又跟師傅學整假天花、掃油漆、甚至表演過雜技、幫師兄弟煮大鑊飯，這些經歷，後來都被黑仔融化為演技，演活眾生。
心靈需要多過肉體需要
到86年參加ATV第一屆《電視先生選舉》，黑仔奪得亞軍及才藝先生，於是正式入行，他笑說當時得獎後的情況竟有點像他新戲《金鴨》的角色，「那時真的有人叫我去做類似伴遊，隨時on call，有客人就陪下飲酒食飯。」或許大家一想到鴨就會想到性服務，黑仔話No No No，有時女仔搵鴨陪，其實只是要人慰藉傾偈，心靈需要多過肉體需要。黑仔在《金鴨》中的角色叫廸偉，正職是紮鐵工人，但神推鬼拱下去了搵鴨王任達華學做鴨，同Babyjohn及劉浩龍合稱金銀潤，但黑仔外型粗獷當然常被彈鐘，直至遇到客人Fiona，「我哋見面嗰場好激，打得好激！」原來阿Fi來叫鴨，就是要打人發洩，鋼條身型的黑仔拳拳到肉都冇問題，二人就這樣打出感情來。
減30磅做鴨
印象中黑仔都有少少肉地，但做訪問當日一出現，嘩我以為係任達華呀！為《金鴨》他減了30磅，其實未接拍前他已想修身，等自己睇落後生點，遇上劇組又有要求，終於有原因的起心肝。「以前做運動好hea，減肥頭一個月做gym行山跑步乜都做，油鹽糖一滴不沾。」本來最鍾意掃街，腸粉燒賣粉果全部忍着淚說Goodbye，最慘是他熱愛開party招呼朋友，屋企又成日大魚大肉，節食第一日仲遇上老婆同朋友在家食盤菜，「忍到我呢！」本來都冇預計會減得成，但見到有少少成績後，黑仔體內的鬥志突然爆發，連老婆都驚訝老公變咗鋼條人，「佢投訴依家成日同我掉亂啲T恤呀，不過佢好好，現在燉湯落腰果代替肉，落肉肥膩。」配一個自信又幸福的笑容。
我冇做大佬好耐喇
姜皓文近幾年在影壇愈來愈吃香，差不多每套港產片都見到他的身影，而且角色戲路也不停擴闊，「以前做很多黑社會大佬，好在後來變成有心路歷程的大佬，哈哈，我覺得13年的《風暴》是個轉捩點，讓大家及導演們都更認識我。」他跟戲中囡囡的對手令人印象深刻，而黑仔也覺得《金鴨》是演藝生涯的一次轉變，例如第一次上TVB，第一次跳舞跳得自如，以前逢新年必在賀年節目跳十字步，「好抗拒，但在《金》跳得開心，我哋練得好認真。」他還對君如有了新感覺，原來以前二人曾經同戲不同場，那時他覺得君如好有霸氣，君如在化妝間他都會迴響，但合作後覺得君如似屋企人多過老闆同同事，「佢成日問我冇晒脂肪凍唔凍，哈哈。」要唔要啲脂肪？我分啲俾你。
text | iris
photo | Yanki
assisted by | Frankie
makeup | Ka Plus Makeup
hair | Tony Lee
