根據來自日本新潟市、成長於大阪街頭嘅藝術家牧田 純Jun Makita自述，那年炎熱夏天，全家去度假，冇落水嘅佢，大部分時間都喺岸上做一個叛逆少年，用一本書將自己封閉起來，有時甚至假裝瞓著；年少氣盛少不更事以為咁樣好「kakkoii」（酷），築起圍牆隔絕（家人）外間一切嘅溝通，回想起，佢自稱係個又笨又脾氣暴躁嘅少年！
而今回於Gallery Ascend舉行嘅新個展《夏季狂想曲》，主軸概念就係對嗰個夏天嘅重建記憶，對於佢自己係一種「愛的語言」。
「你一生中不可能當兩次一個脾氣暴躁的孩子，也不可能跟同樣的人再次成為家人，他們是你這一生唯一的『家』。。。我希望在那個夏天，我有和我的父母呆在水裡，和我的兄弟們到岸邊玩耍。我也希望當初有告訴他們跟我一起抬頭看，看著我們回家的路上，那片非常美麗的星空。」
畢竟老套啲講，No second chance冇下次Take two嘅人生，應該好好珍惜當下眼前人 / 事 / 情 / 物！
牧田 純作品表面看似滿載可愛度、色彩柔和繽紛嘅筆觸，如引領觀者進入屬於佢嘅夢幻世界，但潛意識總有點表裡不一，未必係陰暗面，而流露出淡淡哀愁，同時又會令人感染強悍生命力，回溯一段段純真青澀童真歲月。
Gallery Ascend
香港黃竹坑香葉道43號The Arca 8樓B室
即日起至6月24日
