尋找五、六十年代香港街頭回憶　何藩歷來最全面展覽

世界變了樣，香港亦不停變變變，如果唔係相機影先，玩下手，轉頭樓又拆埋，連企都無碇企。想感受香港嘅昔日回憶，就只有睇番啲相，家陣有機會喇，已故攝影大師兼電影導演何藩又有老香港相展！

上海出世嘅何藩，喺1949年同家人移居香港，一直追尋攝影夢，特別係街頭攝影，贏過300個國際大獎，被譽為「東方布列松」，以拍攝五、六十年代香港街頭寫照而聞名，佢最鍾意影低大街小巷、街市同小攤檔，偏偏呢啲而家買少見少喇。

喺今個月中至月尾，香港蘇富比藝術空間呈獻「何藩：鏡頭細訴香港光影」展售會，帶嚟呢位上年離開我地嘅大師超過30幅手洗攝影原作，亦係佢歷年來最全面嘅作品展覽。同時，展覽仲會首次公開佢嘅攝影物件，例如終生相伴嘅Rolleiflex f3.5雙鏡頭相機。展覽期間亦會推出全新出版嘅何藩攝影集《念香港人的舊》，由佢親自精選，作為一本佢送俾香港人嘅最後傑作。

嗱，拍賣呢，我哋就無錢買喇，但睇拍賣品呢，就唔駛錢嘅，一齊去搵嚟老香港啦！

 

「何藩：鏡頭細訴香港光影」展售會

日期：2017年6月14日至30日
時間：10am - 6pm (星期一至五)；11am-5pm (星期六)；星期日及公眾假期休息

地址：金鐘道88號太古廣場一座五樓－香港蘇富比藝術空間

電話：2822 5566