雖然之前都有《Pokémon GO》，但講到令人覺得任天堂真係插手電話遊戲嘅，應該係早兩星期出嘅《Super Mario Run》，Mario大叔跳入電話，仲要俾錢先買到全隻遊戲，感覺係點？你又最期待邊隻喺任天堂主機玩過嘅遊戲變成電話遊戲？我揀呢5隻。
1.孖寶賽車Mario Kart
既然任天堂都殺入電話遊戲市場，咁第一隻1992年喺超任推出、好受歡迎嘅《Mario Kart》，即係我哋叫嘅孖寶賽車，又會唔會出喺電話？加埋體感其實有得諗。
2.公屋都可以養任天狗
香港地咁多地方唔養得狗，加上我哋又咁忙冇時間養，所以當年NDS推出《Nintendogs》嗰陣，好多人都養番隻，日日帶佢散步，隔住個Mon摸吓佢。如果出喺電話，仲可以用GPS嚟玩散步，夜晚條街又會唔會突然多咗人？
3.心跳回憶 同電話談戀愛
雖然起初係喺PC Engine出先，但1996年都喺超任出過《心跳回憶 傳說之樹下》。既然冇女朋友，咁不如帶個虛擬女朋友出街啦？藤崎詩織喎！
4.篤爆Mon 連打奧運會
Konami一系列Hyper Olympic、Hyper Sports、ハイパーオリンピック'84等等，如果玩過紅白機(在街機推出過Konami"88)，應該都實玩過，就係一味連射連射，再喺適當時間撳掣，而且仲有「刮掣」等秘技，如果出落電話，冇實體掣，會唔會篤爆芒？
5.Mario個friend 高橋名人之冒險島
出得Mario，梗係想玩埋Hudson嗰隻《高橋名人之冒險島》，可以飛斧頭又可以踩滑板，一隻手玩唔玩到？
