Miloza Ma
畢業於觀塘職業訓練中心
從事插畫2年
為藝術創作，往往都要付出，須要有所犧牲，至能夠行出一條成功的道路。平日喜愛發白日夢，鐘意神秘外太空的插畫家Miloza Ma，設計學系出生，在一年前多也決定辭去正職，專心發展全職設計創作。「差唔多兩年前，決定辭咗份工，可以專心啲咁去搞設計同插畫，下定決心要做一個全職創作人，發展自己一直定落嚟嘅夢想。而平時我得閒就會聽冰島後搖滾樂隊Sigur Rós，或者睇下插畫師Mark Ryden嘅古典超現實作品嚟攞靈感，所以大多數嘅作品，我都會透過插畫方式，去表現出嚟，將一啲外太空、神話傳說會有嘅角色畫埋一齊，用實體狀嘅雲同空氣融合，幻化出唔同形狀人物，營造出我腦海裏面嘅超現實世界。顏色方面會用好多粉色系去配搭，內容離唔開宇宙外太空，加咗好多穿越時空嘅元素入去，令到大家睇嗰時，好似去我創造嘅二次元外太空。除咗插畫，其實我4年前都嘗試設計個角色Brain Chid，仲出咗隻8吋figure同其他唔同周邊商品，想用另一個媒介去介紹自己啲心血結晶，試過喺山頂廣場搞個人畫展，或者拎去台北國際玩具展參展，見到大家都對我啲作品好有興趣，呢點支持對我嚟講都幾緊要呀！而喘喘年尾就去咗日本國際藝術節交流，分享咗唔少心得，亦都獲益咗唔少。但我最想都係來年可以喺香港舉辦個大型作品展，而家都埋手儲緊多啲作品，希望到時會有一個完整系列嘅插畫，可以同大家分享我嘅創作，咁當然最想係令業界多啲關注本地創作單位，可以有多啲唔同嘅交流合作，令我哋呢班新紮藝術家可以繼續創作。」
