畢奇
畢業於加拿大設計學院
從事插畫5年
從天馬行空到奇幻科學的神秘世界，都是她最愛的設計靈感，由細個開始就已經對插畫感興趣的畢奇，在加拿大的Emily Carr University of Art and Design修讀設計後，就決定回到香港，繼續向插畫的目標發展。「當時返到嚟香港都有做過一啲關於設計嘅工作，但同時都一直有畫自己嘅作品，所以自己都有去搵下其他機會例如send啲作品去出版社等等，之後又真係慢慢接多咗好多關於插畫嘅工作，當freelance愈嚟愈多時，就決定全職畫畫，專注喺自己嘅作品。而我嘅作品其實係嚟自我設計嘅一個品牌pucky，佢哋係一個馬戲團嚟，而我自己係好鍾意馬戲團嗰個氣氛，感覺係好歡樂，但其實當中反而係有啲陰暗面喺入面，好似以前類似嘅真人show，展出好多古靈精怪嘅野，但可能喺歡樂背後有好多辛酸事發生，我覺得係一件幾有趣嘅事。所以我嘅作品多數就圍繞住呢種俄羅斯馬戲團嘅風格，有好多唔同嘅圖案、好色彩豐富嘅感覺，而畫風都係天馬行空，比較鍾意畫啲唔係真實有嘅嘢，加上用咗好多唔同方法去上色，令到每幅畫都可以有唔同嘅效果。另外喺今年都有一個新嘅嘗試，就係幫周生生製作咗一套關於節日嘅動畫，平時可能就咁睇自己嘅作品都可能只係畫作上嘅公仔，但經過呢次製作就好似見到呢啲公仔變到有生命，都幾有滿足感。而最近我都開始想將平時設計嘅插畫公仔變成實物，製作多啲雕塑、figure等等，可以再接觸多啲唔同嘅範疇。嚟緊都會喺台灣搞一個聯展，希望可以趕得切開始前完成。」
