CULTURE
Jun Oson「形形色色」展

港產片係一種Cult,由新浪潮開始,延伸至上世紀八、九十年代,都別具特色風味,凝聚一班影痴影迷於世界各地,背誦對白琅琅上口、唔通順容易犯駁嘅劇情、粗疏穿崩嘅剪接 / 佈景道具、突然死亡草草了事嘅結局,構成一種光怪陸離離經叛道,顯影曾經嘅紙醉金迷、因時間大限而驚到狂飆掙扎。。。通通都係吸引力!


日本藝術家Jun Oson今回個人作品展「形形色色」,就係以香港、港產片、霓虹夜景為主軸概念,締造出15幅極具一貫輕省易入口消化普普藝術+漫畫幽默感、角色好熟口熟面嘅畫作,重溯港產片盛世經典場面,包括李小龍《死亡遊戲》、發哥《英雄本色》、《喋血雙雄》、《賭神》、王家衛《墮落天使》、《花樣年華》、周星馳《回魂夜》、《國產凌凌漆》等,加上招牌骷髏、機械人、怪物設定配上受霓虹燈影響嘅圖案、獨有色彩運用,濫情啲講,可能大概係佢送俾香港嘅一封封情書!

Jun Oson「形形色色」(MOTLEY)展
即日起至6月18日
海港城美術館 (海港城海洋中心二階207號舖)