葛爺出品一向心思慎密，每每設計諗過度過，一環緊扣一環滿載巧思，而且往往要一廂情願自動波拆解當中嘅隱藏底蘊密碼，締造成連環驚喜心思嘢！
好似慶祝G-SHOCK 40週年＋4A like Black 20週年紀念，繼早前釋出兩大單位聯乘第一彈「迷你黑魂籃球架」之後，G-SHOCK X 4A like Black第二章，全球限量300隻嘅「HEROIC KOGIANT」，將於10月6日起於指定店率先上架！
當然，貫徹4A like Black黑魂風格及滿足葛爺要求嘅嚴謹製作工序，一身黑色、身高達36cm超巨型嘅HEROIC KOGIANT Figure以全樹脂製物料製作，表面經過磨砂質感後期處理，並採用多達五層上色程序，從而達至接近真實膚色！
隱隱約約見到個「KOT」字嘅HEROIC KOGIANT超巨大英雄Figure，「著住」件印有「23」字樣嘅波衫，印證兩大單位於2023年展開聯乘，亦象徵「23」號籃球Legend；另外今回葛爺親自設計聯乘企劃標誌，將兩個4A like Black招牌Logo打孖上，代表創立兩個十年，同時大結合四個羅馬數字「X」組成嘅「XXXX」圖案，即係四個阿拉伯數字4 X「10」，紀念G-SHOCK 40週年！
鬼鬼馬馬嘅葛爺對於暗黑 / 暗格設計，當然「唔留手」！HEROIC KOGIANT如九宮格嘅底座，可以成為一個井字形收納空間，中間位附上一張儼如籃球場圖則、雷射刻印生產序號嘅獨一無二Black on Black全黑證書，加上橡膠製造嘅全黑魂迷你籃球，對應聯乘第一彈「迷你黑魂籃球架」，可以輕輕鬆鬆玩射籃啦！另外嗰個中間位更專誠設計完全Fit晒放置一枚原裝紙盒包裝嘅G-SHOCK DW-5600E-1V手錶，收藏控嘅黑天堂！
暗格入面裝原裝紙盒，咁延續G-SHOCK初代手錶設計精髓、採用樹脂作錶身物料、具防震、支援200米防水及EL背光照明功能嘅DW-5600E-1V腕錶可以點樣展示呢？葛爺就建議將錶佩戴喺HEROIC KOGIANT手腕之上，Figure如藝術裝置亦成為真．錶架，絕對係另一特大驚喜得分位！
HEROIC KOGIANT將於10月6日至15日在POPCORN SUPPLY K11 Art Mall店及THE BIG APPLE澳門荷蘭園旗艦店以套裝形式優先限定登場，售價HK$4,380。
其後由10月16日起，於CASIO授權網上旗艦店選購任何一款G-SHOCK手錶，即可以HK$3,980加購HEROIC KOGIANT！
值得一提，G-SHOCK另一聯乘作，首度邀請本地壁畫藝術家何文蕙（Bao）合作，締造出聯名別注Tote Bag，當中賦予聯乘企劃「XXXX」標誌、G-SHOCK經典5600型號及HEROIC KOGIANT Figure，加上Bao標誌性黑貓以及八 / 九十年代回憶產物，如Game Boy、街機、舊式電視機、錄影機、《俄羅斯方塊》、動畫《為食龍少爺》等，滿載令人懷念嘅集體回憶，於G-SHOCK專門店或CASIO授權網上旗艦店入手G-SHOCK手錶，就有機會獲得G-SHOCK x Bao別注Tote Bag或G-SHOCK X 4A like Black迷你「黑魂」籃球架一個啦！
