驚喜嘅意思，就係要你估佢唔到，咁先夠好玩！好似Leica徠卡早前推出本年度嘅限量版麻雀禮盒，最搶眼當然係以代表Leica經典紅黑配色為主調，而且滿載具心思、巧思嘅設計細節，如黑色啞光手提皮箱上面好低調咁壓印咗Leica標誌，多處沿用高辨識度Iconic紅點標誌、將傳統「一索」設計為徠卡望遠鏡小鳥標誌、以鏡頭刻度條代替傳統「索子」花紋、圓形相機光圈化作「筒子」、「花」同埋「白板」則分別採用咗兩種取景框設計；另外，選用素材都相當講究，146隻麻雀以高耐用性防刮進口仿瓷物料製成，以陶瓷製作籌碼、金屬物料締造出4粒骰子。麻雀禮盒限量推出800套，每盒都附有限定編號，雀友、徠卡粉送禮自用心水之選！
