可能是日本人多年來受攝影文化的熏陶，即使在數碼相機咁普遍的廿一世紀，佢哋依然對菲林及菲林相機相當熱衷。雖然好多香港年輕人未必識得即棄相機，但在日本卻依然是相當熱門的東東，佢哋用即棄相機影相就像我們用手機影相一樣，是再平常不過的，正因為咁所以一直熱銷，即棄相機才得以保住一席不被淘汰。香港其實都有即棄相機買，只是款式及種類不及日本咁多樣化，筆者今次就向大家介紹一下現在香港還能買到的熱門即棄相機吧。
日本の即棄相機
即影即棄相機，又名「一次性相機」，日文為「使い捨てカメラ」，並非只能影一次，而是只能夠影一卷菲林，影完的話就要成部機俾曬相舖沖，一沖就攞唔番部機了。如果儲起部機唔用，入面的菲林就會過期。用過期菲林影相，相片會有偏色、高雜訊或者感光不足的情況。如果保存得唔好，卷菲林可能會完全影唔到嘢，所以影或唔影都好難取捨。唔好覺得即棄相機係老土嘢，筆者仲記得之前去日本的二手相機舖尋寶時，店入面仲賣緊好多款即棄相機，仲要好多型號都係香港買唔到嘅，上至70歲下至17歲嘅日本人都仲會買來影相，我見過，我真係見過。
香港の即棄相機
現在市面上可買到的即棄相機大都是Fujifilm及Kodak的出品，當中Fujifilm的還是比較受歡迎，比較容易買到的大概有4款，QuickSnap Superia、QuickSnap Marine、QuickSnap Simple Ace及QuickSnap 1600 Hi-Speed，雖然4款中有3款個樣都差唔多，但普遍都比Kodak嘅設計靚啲。因為Fuji的菲林成像偏冷色調，noise抑制也相當不錯，所以就算影夜景也是不二之選，當然ISO太高的話無可避免還是會出現noise。而現在市面上售賣的Kodak即棄相機主要有兩款，分別是FunSaver和Sport，兩款的外形都比較sporty，Sport仲係一部防水即棄相機，支援15米深防水，呢點就比Fujifilm QuickSnap Marine優勝，因為QuickSnap Marine最深只支援10米防水。比起專登用幾千蚊去買一部防水相機或一次性防水袋，好多人都仲係會選擇以即棄防水相機代替。而Kodak的菲林成像偏暖色，用來影動物或食物就最適合不過。兩部機的ISO都有800度，影日頭絕對無難度，夜晚或者太暗的環境可能就須要閃燈輔助。
不可不知の即棄相機
香港能買到的呢幾部即棄相機，算是比較普通的機款，無乜特色可言。而即棄相機界都有好多特別機款，例如筆者前文介紹的「写ルンです」30周年紀念版。除此，Konica Wai Wai及ILFORD黑白即影即棄相機亦都相當值得收藏，當中Konica Wai Wai更是已經停產多年，現在已經很難買到，就算有幸買到，入面嘅菲林都已經過期，未必影到相。
a/Fujifilm Hong Kong/2376 0998
b/SHOWA/旺角好景商業中心901c/9021 2782
c/金鈿專業沖晒中心/2394 8847
PREV
