潮流事，潮流了。雖然終日爛街入手衫褲鞋襪，但有時睇世界各地咁多個fashion week，有時真的由衷感到「時裝嘅嘢我識條春咩」之感概。雖知道商業世界，嘩眾取寵其實永遠是抓人眼球的最佳門路，但然而每年兩季的fashion show總會有些讓你睇到唔識評論的時裝時刻。Rick Owens的人肉背包固然是為近期一例，不過時裝變革咁多年，驚嚇、叫絕、無聲出的經典之期絕對唔止得咁少，今次《TOUCH》網上特別編集便為你網羅歷年來10大最啜核的fashion moments，真心唔到你唔服！
時裝品牌出背包不是新鮮事，但將整個model揹上身的創舉，Rick Owens係第一個亦相信會係最後一個。雖然今季圖片早已廣泛流傳，不過Rick Owens早前便親自解畫，講到明如此破格概念乃來自澳洲performance artist Leigh Bowery背着其妻的畫面而引發﹐同時亦將之化作專重女權的一個訊息。咁講法又的而且確好似明咗啲喎，似乎係。
早幾年男裝J形比堅尼網上大熱，有理由設計靈感係來自Alexander McQueen 2009 S/S。時裝品牌出泳褲早已不成新鮮事，但要出到好似Alexander McQueen咁大膽咁曝露又是另一回事，個人認為最出色是為肉色底橫配以延伸纏頸之設計，其實睇落仲似波叔出城。
Gareth Pugh的設計向來以偏鋒難着為人所道，然而今年春夏的一系列單品未免又太過厲害。雖然美其名是春夏設計，但每個模特兒都以包到實兼幾何圖案包裹全身，以藝術角度睇的而且確又幾靚，不過牛頭馬面乜都齊，農暦7月着用無誤。
有理由相信Gareth Pugh癲開有條路，其實早於2006年秋冬一季便已經暗啞流露。君不見兔仔、小丑乜都齊，有理由相信靈感乃來自《愛麗絲夢遊仙境》，不過一切以黑色主調搭上輕量金色示人，癲得嚟又夠玩味濃郁，可惜未必有人carry到，所以雪廠街間舖都變咗ACNE STUDIOS。
你以為龍蝦時裝僅為元首夫嘅專利咩？其實早於2013年S/S John Galliano便一早將之放入男裝裏頭。喂，龍蝦寫入時裝其實Thom Browne都有做過，不過一向大癲大肺的John Galliano便索性將整隻龍蝦放上身，個人認為應節嚟講加埋大閘蟹會效果更佳。
又係Rick Owens，呀應該係Dick Owens至真。何出此言？事關這季Rick Owens的男裝統統以「現袋裝束」示人，其男裝連身衣設計清一式於不㝷常位置開窿，是以搞到一眾models均要於天橋露械示人。對於這季Rick Owens的意見是，希望爭取男女平等。
觀賞Thom Browne的fashion show其實永遠都是享受，事關他創意其實可以說得上季季新鮮季季甘。懶理其灰色西裝有多本格有多original，但在他手下的天橋演練又永遠是另一回事。就好像2012年秋冬一季為例，三件頭西裝已是永恆定番，不過布朗先生便將一眾models的膀頭墊到有咁高得咁高，個個骨格精奇搞到Big Bang都要着埋一份，係勁無？
Valentino 2015 fall其實沒有多大驚嚇之處，不過勁就勁在此季聯同了《Zoolander 2》的Ben Stiller與Owen Wilson壓軸行貓步！驚喜十足兼夾連時裝惡魔Anna Wintour都一齊玩埋一份，喺香港方面我希望鄭中基同李璨琛可以係izzue時裝季秀入面行埋一份。
雖然正式宣布了暫停所有READY-TO-WEAR系列的設計，但要數Viktor & Rolf RTW的經典時刻，2007年這一季其實一定唔數唔得。經典就經典在其實今季衫褲鞋襪統統無甚睇頭，最矚目的不過將射燈、燈腳等撐起成套衫，唔知點解我諗起周星馳拎阿冧六⋯⋯
時裝界浮誇王嚟講，Walter Van Beirendonck B仔夠膽認第二相信都無人會認第一。個人認為喺B仔面前，Jeremy Scott都要行埋一邊。喂，你估好似2012年春夏男裝咁將個人包到一嚿嚿，但同時又有美感係咁易㗎？之但係唔知點着囉。
