人生三大矛盾：搵食啫，犯法呀？我想㗎？我相信如果你衝埋去捉住黃子華，問佢點解咁快冇飛賣，佢都會搬呢三大矛盾出嚟擋駕。又係喎，留咁多飛俾贊助商嘅？「搵食啫」，咁快賣晒飛？「犯法呀？」，點解咁耐先開一次棟篤笑？「我想㗎？」，歡迎兜亂任用，絕對唔會有破綻。
啲飛難買到一個程度，係一票難求。去售票網嗰啲唔係叫做買飛，嗰啲叫做賭飛，賭佢有飛，因為喺售票網買飛，只可以用一種方式，就係F5，同一個掣，按呀按呀。點解香港啲騷咁難買飛呢？唔好問呀，趁人多你好快啲去賭，等所有飛賣晒之後，你就會發覺，個世界已經唔再存在一張正價嘅飛喇。
但講真，好多香港人對黃子華，都愛得好盲目。唔信的話，你問心，去撲飛嗰陣，究竟知唔知道個騷內容係乜？有乜好睇呢？答唔到吧，鬼咩，得張海報，上面得十二隻大字：「黃子華棟篤笑唔黐線唔正常」，同埋唔知想表達乜嘢的黃子華相片一張，冇喇，其他全部一片空白。所以一個人如果唔係鬼上身嘅話，好難會咁辛苦撲一張自己都唔知會講乜嘅飛！
不過盲目亦唔代表係錯，我係唔會懷疑黃子華嘅。真係，我咁大個人，從來冇懷疑過黃子華。因為我不嬲覺得，如果你想睇黃子華，個棟篤笑一睇落去就好好笑，咁冇理由咁笨去懷疑佢。如果個棟篤笑睇落去已經唔吸引，而佢仍然要開，咁佢梗係有秘密武器啦。
同埋如果真心鍾意睇棟篤笑嘅觀眾，其實除咗黃子華，都冇其他選擇。好多所謂棟篤笑係攞正牌講大話，各位你哋地明唔明乜嘢叫做棟篤笑？棟篤笑就係，你完騷幾年我記得你就叫做棟篤笑，你完騷幾年我唔記得你就叫做搞下gag。我咃睇過太多gag，但睇得太少棟篤笑，恨睇，係應該嘅。
同埋呢，睇黃子華棟篤笑好犀利，唔係因為佢在紅館開，而係佢嘅棟篤笑內含太多人生金句哲理，可以睇一晚，就學咗我咃一世人都學唔到嘅嘢。睇11場，已經輪迴11次！如來佛祖都話，使唔使呀？
Text | 何惠德
