愛咖啡嘅，心目中都總會有一個長長嘅咖啡（店）名單，有生之年，能夠親身到本 / 當地品嘗最地道 / 源自世界各地咖啡豆由咖啡師手沖嘅精品咖啡，而日本京都咖啡店KURASU絕對係個List入面其中一個名字！
呢間最初於2013年由日本小型線上家居用品網店開始，其後發展成咖啡專賣店嘅KURASU，繼日本、新加坡、泰國、印尼後，第八間分店正式進駐香港！
創辦人兼行政總裁大槻洋三先生（Yozo Otsuki）自幼於母親經營咖啡店中度過好多成長
時光，深受薰陶，其後，前往美國及加拿大大學進修，發現雖然外國咖啡店文化盛行，但咖啡師往往反而喜好選擇使用日本咖啡器具，啟發佢決定將日本咖啡文化引入國際舞台呢個念頭；大學畢業後，曾回東京從事投資銀行工作，後來由於對咖啡文化嘅熱忱熾熱程度，佢最後決定毅然放棄投資銀行高薪厚職穩定工作，創立KURASU品牌，希望將京都獨特咖啡文化推廣到世界各地！除了販賣日本咖啡用品，KURASU積極發展品牌服務，包括自家焙煎咖啡豆、日本茶和咖啡豆訂閱計劃等。2016年，開設首間咖啡店，以家鄉京都為原點出發，逐步拓展至全球，對大槻先生而言，咖啡唔單止係一種飲品，更成就佢更豐富多彩嘅人生！
新店位於尖沙咀，沿用日式木系簡約內裝風格，希望憑藉「手沖」及「冷泡」精品手沖咖啡＋按客人口味推薦不同豆種及沖煮方式，儼如個人化咖啡體驗為奔波忙碌嘅香港人締造一個可以享受靜謚身心靈、休閒小確幸好時光嘅「小綠洲」，值得留意，店內選用嘅咖啡豆由京都總店專業焙煎匠人焙煎後直送到港，確保以最適當焙煎程度，發揮出不同咖啡豆嘅特性及風格，還原京都總店嘅咖啡風味。
另一招牌之選，採用來自京都茶園優質綠茶加工而成、苦澀味較少散發濃厚茶香嘅抹茶粉，加以KURASU精選特濃咖啡、日本牛乳，營造出三種層次效果嘅Matcha Latte Espresso，「抹茶控」必試！另外可搭配香港新店限定輕食，如焦糖布甸配雲呢拿雪糕、法式焦糖燉蛋泡芙、焙茶巴斯克芝士蛋糕，Sweet tooth出沒注意！
KURASU
尖沙咀美麗華廣場2期地下G65號舖
2398 8821
