另一個好想去台北嘅理由！
位於松山文創園區嘅實驗性閱讀空間不只是圖書館 Not Just Library一直係愛設計/藝術雜誌/書迷嘅天堂，經歷樓上、地下第二回搬遷後，最新落戶點都係松菸地區，一間塵封隱藏咗半世紀嘅神秘北側員工澡堂，原本係當年製作香煙女工收工前嘅梳洗地點，延伸不只是圖書館嘅主軸理念，唔單只係閱讀書籍空間，更會舉辦展覽、講座發生更加多可能性！
重新開幕嘅「不只是圖書館 Not Just Library」，由柏成設計團隊及景觀設計師太研規劃設計吳書原聯袂將日治時代留存至今古蹟空間、擁有通風天井、由充滿歷史感磁磚砌成嘅澡堂空間改造，最大亮點當然係澡池凹洞改成嘅座位，以及可加上座墊嘅階梯式藏書架。內裡空間分為三大部分，就好似以往進入澡堂前要先更衣、淋浴、然後才泡澡嘅程序（當然唔係叫你而家除晒衫褲全裸咁去睇書啦），賦予松菸澡堂對外天井戶外花園，以「泡書」五感閱讀體驗為名，構築締造成滿載書籍、氣味、植物、陽光嘅書澡堂，洗滌心靈文化場所！
另外，值得一讚，不只是圖書館每年都會邀請唔同設計單位製作新嘅年度入場票券，今年由 Onion Design 洋蔥設計一系列年度票券、書後卡/借書證，復刻過往人手壓印借出/還書日期嘅體驗，而書後卡票券更印上設計師聶永真、設計生活家吳東龍、週刊編輯李取中等16位來自不同界別領域創意人嘅推薦書單，值得收藏！
不只是圖書館
台北市信義區光復南路133號1F（松山文創園區 / 松菸口）
開放時間：週二至週日 10:00 - 18:00 週一及國定假日休館
