暑假話咁快就要完，想抓緊夏天的尾巴，不如嚟個快閃之旅，拎四日假期向東京、首爾、曼谷出發﹗小編徵詢幾位旅遊達人意見，搜羅最啱香港人嘅旅遊熱點，以下三個行程，吃喝玩樂血拼乜都有齊，必定滿足到你呀﹗
東京快閃遊：
DAY 1 做個郊遊文青
嚟到日本，梗要搵個靚景打卡﹗一落機即刻出發到鎌倉，坐住江之島電鐵欣賞沿途海岸美景，再到BILLS 七里ヶ浜店，一邊望住靚View，一邊食住佢哋最出名嘅Pancake﹗跟住就啱時間，上江之島瞭望台影日落美景，夜晚就返到新宿酒店Check-in，有精力的話就走埋棒球館同去24小時驚安之殿堂掃貨﹗
DAY 2 千金散盡血拼日
大出血之前，先要叉足電呀﹗去原宿「WORLD BREAKFAST ALL DAY」食盡世界各地嘅早餐，然後順住由原宿、涉谷殺到去下北澤血拼﹗Shopping完之後，梗係要擦返餐勁嘅，有咩地方一次過可以食燒海鮮、燒肉同壽司，當然要去轉惠比壽啦﹗
DAY 3 優哉游哉食嘆玩
朝早先去晴空塔「野口鮮魚店」，嘆返份由築地運嚟最新鮮嘅海鮮丼，下畫就嚟到清澄白河Blue Bottle飲住咖啡，過一個悠閒嘅午後時光，入黑之後再到六本木東京鐵塔影至靚夜景，旅程最後一晚，不妨去埋TOKYO DOME CITY Spa LaQua享受露天風呂，舒緩一下疲勞﹗
DAY 4 Shopping Last Chance!
先去東京大神宮求返個愛情禦守，呢度被指係日本求姻緣最靈嘅神社，跟手去神樂坂食返個和式甜品，保佑愛情Sweet Sweet﹗最後去埋秋葉原AKIBARA MARKET同上野手信街，一於上機前作最後衝刺呀﹗
Source : 周奕瑋
首爾快閃遊：
DAY 1 買新衫換新LOOK
落機即去明洞酒店Check-In，放低完行李，就到附近梨花大學小店購物，呢度嘅Boutique款式又多又新，買件新衫換個新造型，自拍打卡都靚過人﹗夜晚再到「孔陵一隻雞」食出名雞鍋，食晒啲雞之後記住請「阿豬媽」幫你加飯，寧舍滋味架！
DAY 2 弘大瘋狂食瘋狂買
一朝早走到明洞Congee House食碗韓式粥，份量大又有唔同款式嘅小菜配搭呀。食完之後，推介到小店MIXXO和BESOLE，女生們一定有收獲﹗記得試埋O’SULLOC出品嘅綠茶蛋卷同新地，包你一食難忘﹗休息完繼續血拼，落去弘大1號出口嘅BUTTER買定手信送畀朋友，夜晚再去尋找星星的味道，喺橋村嘆返個炸雞配啤酒﹗食到咁飽，最好梗係去漢江公園散下步同放下煙花啦﹗
DAY 3 宮廷半日體驗
去得韓國，無理由唔去趟宮廷打個卡﹗先到安國站嘅昌德宮體驗下宮女生活，再落弘大站既SHOOPEN繼續血拼，裡面嘅鞋唔止Made in Korea，仲好鬼抵買，點都要買對襯衫呀！掃完貨之後就到新村食locoloco蒸海鮮，再到Natuur Pop食雪糕做飯後甜品，好滿足哩﹗
DAY 4 文青至愛熱點
最後一日HEA住咁行，衝出首爾走去南怡島就啱晒喇。用一個早上去島上面，影下文青靚相，又欣賞下自然風景，夠晒寫意。跟住慢慢再出機場，記得留返時間做退稅呀﹗
Source : CynBunny
曼谷快閃遊：
DAY 1 泰式購物
快閃之旅目標為本，機場番酒店梳洗過後，就出發去Chit Lom站，走到附近嘅Siam Paragon同埋Central World行街Shopping。Central World、Zen同埋Isetan一條天橋連起晒三大商場，怕曬黑既女生可以輕鬆戰勝太陽喇。Central World仲有間當地人推祟的新派泰國餐廳Apinara，大排長龍司空見慣，大家去之前記得訂位啊﹗行夠食夠就去埋附近嘅Asia Herb Association，按摩完至番酒店休息﹗
DAY 2 泰式文化
去到泰國點都要感受下當地文化嘅，佛教係泰國最大宗教，去趟寺廟感受到當地文化之餘，亦可以影到好多靚相做紀念。參觀順序可以如下： 大城 -> 瑪哈泰寺 >拉嘉布拉那寺 ->帕蒙空博碧寺 -> 帕席桑碧寺 -> 柴瓦塔娜蘭寺 >崖差蒙空寺 －>邦芭茵夏宮-> 安娜教堂。 行到攰一攰，夜晚就順便去新火車夜市，食盡超人氣街頭小吃！
DAY 3 泰式貼地
呢日建議以包車形式，一次過去晒曼谷最有名嘅三個市場：泰國丹嫩莎朵水上市場、 美功鐵道市場同安帕瓦水上市場。所謂水上市場就係旅客搭住小艇購物，貨品雖然都是為旅客而設，但景色優美夠晒風情，絕對係難得體驗！打完卡仲可以去曼谷夜市同埋曼谷貨櫃夜市填飽個肚呀。
DAY 4 泰式衝刺
旅程最後一日，就去BTS ASOKE站旁邊嘅Terminal 21商場繼續血拼，掃完貨就順去埋佢哋嘅FOOD COURT，裡面又多選擇又抵食﹗之後再去附近嘅 King & I Spa嚟個泰式按摩 ，叉足電以最佳狀態返番香港。
Source : 旅行主義 . Travelism / 風信子
