皇家奶茶慕絲蛋糕
天氣咁熱，最啱食好西氹自己開心。Lady M即將推出全球首度發售嘅新蛋糕「皇家奶茶慕絲蛋糕」（次次都係喺香港首度發售咁，巧幸福哦！），而Lady M亦首次落戶澳門，7月中試業，獨家推出「熱情果千層蛋糕」，睇嚟要過大海打卡喇。
先講香港Lady M創作嘅「皇家奶茶慕絲蛋糕」，以頂級祁門紅茶整成幼滑慕絲同忌廉，茶香好似新鮮即沖嘅絲滑英式奶茶，配埋朱古力海綿蛋糕作基礎，同埋面層單一莊園出產嘅朱古力手工小圓牌，當然唔少得個品牌M字，6月29號在全線香港 Lady M發售件裝，千祈唔好錯過。
熱情果千層蛋糕
至於Lady M首間澳門蛋糕精品店，落戶金光大道金沙廣場裡面擴建嘅最新區域，新舖佔地超過4,000呎，據講感覺好似紐約露天咖啡室咁，Order埋獨家推出嘅「熱情果千層蛋糕」，熱情果蓉融入細幼忌廉之中，每一層班戟透薄如紙，面層就係熱情果醬，每一口都又酸又甜，夏日咪就係應該咁囉！
Lady M 澳門 金沙廣場店
澳門氹仔路氹金光大道金沙廣場 2 樓 2203B 號舖
(853) 2855 1680
Lady M 香港
