尖咀芬蘭浴？冇錯，唔係太子芬蘭浴，而係「真．尖咀」芬蘭浴，呢個由Culture For Tomorrow推動、名為「沐熱乘涼 Hot is Cool」嘅桑拿展覽，坐落喺尖沙咀文化中心露天廣場，結合芬蘭桑拿同香港涼亭嘅元素，創辦者希望引發兩地跨界別嘅文化交流，去到星期三Ja，未睇嘅快啲去啦！
可能大家都知道，今年係芬蘭慶祝立國嘅100周年，今次嚟埋香港慶祝，搞咗呢個「沐熱乘涼」嘅跨界文化活動，其實唔止露天桑拿體驗，仲包括設計展覽、文化講座、創意工作坊、閱讀音樂分享會等等，希望以「空間」做媒介，擴大創新設計嘅影響力。
今次，「沐熱乘涼 Hot is Cool」展覽共分「建築新演繹」、「設計與生活」同「年青人發想」三部分，旨在令市民親身體驗芬蘭同香港兩地建築師對兩種空間嘅想法之外，仲可以透過文字、影像同兩地生活設計品等，反思兩地生活文化異同。
話時話，呢個桑拿又有冇得焗一焗呢？答案係有嘅，不過一早Full晒喇，就睇下你好唔好彩，有冇得執死雞喇！
「沐熱乘涼：芬蘭與香港的文化對話」
日期：即日起至12月13日
地點: 尖沙咀文化中心露天廣場
開放時間：上午10時至晚上7時，免費入場
