夾band，為咩？威囉、型囉、疊馬囉、巴閉囉、英雄主義囉。最重要，真係鍾意音樂囉。不過今次訪問Rubberband阿偉、Kolor Sammy同KB，唔只因為夾band，因為佢哋仲夾埋演舞台劇《2017》（其實之前已經演過一次，今次係re-run）。現場要控制呢班瘋狂band仔，導演辛苦嘞。
《尋找快樂時代2017》以香港一間80年代酒廊為引子，駐場樂隊Jumper由阿偉、Kolor Sammy、KB、仲有Mr.的Alan扮演，遲下幾位更會真係開始繼續以Jumper身份夾band。以為幾位本身一定好熟？錯錯錯，「雖然大家識咗十幾年，但真係講過唔夠十句嘢，哈哈哈哈。」因為以前個個都係工作先會見面，大家吹幾句水已經要上台，今次，終於有機會坐低，認真了解下大家。
「你唔會估到阿偉係搞gag王。」竟然KB同Sammy都咁講？阿偉平時又真係好正經，「啲 人以為我好靜，其實我好多嘢講。」最正係阿偉嘅成長版會係黃德斌！「連我老婆都質疑呀，哈哈。」但睇睇下，佢哋有啲位又真係幾似，嗰種溫文內斂feel呢。
「導演應該係睇到啲特別嘢先會咁安排㗎。」平時一向俾人癲喪感覺嘅KB，角色名叫巨人，好霸氣。性格呢？佢話似佢以前，火爆！唔講真係會以為係為佢度身訂造，「巨人同我以前一樣，唔係好理其他人感受，依家我唔到啦，個人襟撈咗，哈。」呢個時候Sammy忍唔住出聲，「所以佢喺戲入面，大條道理鬧人，但鬧人之餘個人又kai kai地。」KB反駁話俾人知道自己kai都唔緊要，起碼有新嘗試，仲話第時入棺材都係一個好回憶。佢真係好kai呀喂。
至於Sammy，角色名叫神父，聽落都知佢應該好多大道理好多嘢講，「係㗎，我做band leader，火爆得嚟又要顧全大局。連平時想同隊band講，但唔敢講嘅嘢都講埋出口。」例如咩呢？原來係「你咁hea，唔好留喺度啦，你走啦！」嗱，Sammy隊友自己睇路啦。
演出舞台劇其實需要好高技巧，即時面對對手與觀眾，練習時更要面對埋自己內心。起初大家唔知何謂「演戲」，排戲時都會頭痕。Sammy同阿偉都話，試過以為對白就咁講咪得囉，「點知原來你唔俾足夠感情，對方其實係接唔到，講唔出下一句對白。」
至於一向搞搞震嘅KB，更被眾人話佢「最認真」，而且好多意見，又爆肚又爆粗，仲想同歡眾互動。「導演即刻制止我，叫我千祈唔好！」不過KB自己忍笑都忍得好辛苦㗎，例如有場佢要嬲爆爆咁坐埋台邊，好近好近觀眾，見到啲人笑，佢又一齊好想笑……入場嘅朋友，你哋唔好引佢笑呀！
而到底幾時先真佢哋嘅快樂時代？KB答案最有代表性：「唔係一個時代，係我每日返到屋企，喺屎坑痾屎睇YouTube嗰時，即係hea，哈哈哈哈。」我諗，好多人都係。
Venue：The Stadium
