每次有荷里活大片嚟香港上映，通常邊度最先爆呢？戲院？唔係，係紅磡火車站上面個停車場呀！近日新片《金剛：骷髏島》（Kong Skull Island），又喺紅磡火車站掛上大型3D噴畫，大家一經紅隧，就會見到呢隻電影史上最巨大金剛，破牆而出同你say Hi～《金剛：骷髏島》3D噴畫由本地立體錯視畫作始祖黃俊飛設計，充分表達出King Kong被入侵家園嘅憤怒。3月9 日，大家就可以睇下King Kong點同Tom Hiddleston、Samuel Jackson等人抗爭，誓要趕人類出King Kong之家骷髏島。
其實紅磡火車站停車場一向係電影兵家必爭之地，而且幅牆成日俾人「打爛」！例如《復仇者聯盟2》、《無敵破壞王》、《奇異博士》，前兩者就打爆幅牆，Dr. Strange就喺幅牆度行出嚟。另外香港廸士尼樂園都有喺度賣過廣告，賣「迷離莊園」，隻眼同幅牆融合，都幾得意㗎。
