2017奧斯卡尋日公佈咗提名名單，《星聲夢裡人》（La La Land）有14項提名，平咗《鐵達尼號》（Titanic）喺1997年嘅紀錄！包括最佳電影、最佳導演、最佳女主角、最佳男主角、最佳原創劇本等大獎。而緊隨其後就係《天煞異降》（Arrival），有8項提名，但偏偏主角Amy Adams無提名！外國媒體都大跌眼鏡，曾經有指今次係Amy Adams從影最佳演出，全套《天》都係睇佢心路歷程同變化，雖然有勁敵Natalie Portman（個人覺得佢sure win），但提名都無份又真係慘啲。有指因為Amy Adams另一套作品《夜行動物》（Nocturnal Animals）分薄咗啲票，哎呀，可惜荷里活無雷動計畫。
另一令人失望位，就係《NASA無名英雌》（Hidden Figures）的女主角Taraji P. Henson無入圍。《NASA》改編自真人真事，講3個黑人女數學家，60年代點幫美國喺太空競賽上打低蘇聯。呢套戲香港雖然未上映，但喺美國氣勢如虹，一上映立即票房稱冠，大比數拋離《星聲夢裡人》（La La Land），上到第二周仍然十分硬淨。
其他應該有份提名，但最終無影嘅包括：Tom Hanks，無憑《薩利機長：迫降奇蹟》（Sully）入圍最佳男主角，導演奇連伊士活亦無提名；因為金球獎，《死侍：不死現身》（Deadpool）本來都有人睇高一線，結果乜都無；馬田史高西斯套《沉默》（Silence）未上映前幾好聲勢，但上完就靜晒，只有最佳攝影一個提名；《海底奇兵2》（Finding Dory）無入圍最佳動畫；《夜行動物》（Nocturnal Animals）導演Tom Ford消失了，而憑呢套戲奪得金球獎最佳男配角嘅艾倫莊遜（Aaron Taylor-Johnson），亦係連提名都無，反而同片另一男演員Michael Shannon就入圍最佳男配角，神奇耶。
