農曆年離不開都係做嗰幾樣嘢，逗利是、賭下錢、狂食嘢，今年不如加啲高科技玩意？例如「e利是」、「電子射龍門」、「自動派牌器」！至於食嘢，low tech啲用返口食OK㗎啦。
滙豐同恒生「e利是」
首先要下載手機銀行App「滙豐轉帳易」及「恒生轉帳易」，然後登入使用「e利是」功能就得。派幾多錢隨你鍾意，收利是嘅朋友只要有滙豐同恒生戶口就得，你入佢個電話號碼就送到。系統預設咗「e利是」20、50、100港元，但可低至0.01港元，仲有啲預設祝福俾你揀。而「e利是」連續兩天最高轉帳額為3,000港元，所以想派大利是嘅朋友，都係要用返真銀紙。
「電子射龍門」
其實2015年已經有，台灣game，開版有Q牌小豬。至於點玩？咪就係射龍門XD，不過都幾多玩法，至於點解唔玩返真實啤牌射龍門？如果你無親戚朋友，或者坐車嗰時，呢個可以頂住先囉。網上其實仲有電子魚蝦蟹，都幾得意，但我就想食多啲。
「自動派牌器」
多得偉大嘅淘寶，我首次接觸「自動派牌器」，比見到「電子麻雀枱」更「阿May Sing」！「自動派牌器」有幾款，有種只識洗牌、有種圓形會轉下轉下派埋牌、有款係成張枱咁大，開賭場咁款（喺香港犯法㗎）！親，你屋企放得落邊款就買邊款啦。
最後祝大家一句，2017年贏多啲食多啲開心啲。
