《返校》係以台灣戒嚴時期為背景嘅PC遊戲，上架12小時竟然衝上遊戲銷售平台Steam世界第3名！遊戲畫面只係2D橫向，畫功亦唔算精緻，一隻內容咁有區域性嘅遊戲，到底係玩咩，令佢可以全球爆紅？
台灣媒體稱《返校》為「台灣之光」，因為佢氣勢實在太勁，1月13日上架，開賣12小時就成為遊戲銷售平台Steam世界第3名，打低埋GTA，好評亦高達97%。由8人開發的恐怖冒險遊戲《返校》，背景是60年代的戒嚴時期，玩家會做一個失憶女學生，喺學校偶遇一名男同學，但因為大雨斷路，兩人被逼於學校過夜（唔好心邪），然後學校開始變成陰曹地府！玩家要避開鬼怪，更要搵道具解謎，慢慢你就會知道女主角經歷了甚麼，令她走到這一步。
《返校》成功衝向國際，但內容其實幾反其道而行，不玩全球共通，人皆共知的恐佈符號，反而用了大量亞洲元素：例如黑白無常、神壇、符咒、最經典梗係夜晚返屋企見到一對紅色神檯燈，點都會有啲驚。前段有鬼，後段則以劇情主導，甚至有政治壓迫元素，有網民就表示人心比鬼更恐佈，呢樣就應該係世界共通。《返校》畫風雖然唔靚，但簡單得來更顯詭異，背景音樂仲有嗩吶，我本人就非常怕嗩吶聲……
《返校》game play大約3-5小時，售價新台幣$299，會有兩個版本嘅結局。我本身好少玩恐佈遊戲，《返校》除咗有所謂嘅「jump scare」，失驚無神嚇到你彈起，其實個故事唔錯，以這個價錢絕對值得一玩。2月6日《返校》更會有改編小說登場，相信都好大機會可以改編成電影，大家襯今個weekend可以快手玩咗隻遊戲先。
