念力，諗下都有力，最基本就屈匙羹、再勁啲可以打怪獸、飛、同埋知道晒全地球人諗乜。想學？而家呢班星級大師免費教你，唔使去九展，自己喺屋企練啦。
Darth Vader－《星球大戰》系列
神檯級元老，佢哋仲自成一派叫「原力」。讀心、預知、隔空取物、長壽、意念傳送、強化身體、甚至醫病都得！不過Darth Vader大師唔多講嘢，所以上錄影班好似抵啲。不過學成之後要小心手，呢派人成日斷手嘅。May the force be with you.
Professor X－《X Men》系列
X教授好鍾意教人，仲開埋私校《The Xavier's School for Gifted Youngsters》幫啲控制唔到自己嘅小朋友。佢可以接通全世界人類嘅思想，你都可以！但你首先要起個「腦波強化器」，同埋買間超大豪宅裝住佢，住200呎嘅話就算啦。可惜暫時佢未研究到念力阻止脫髮嘅方法。
Eleven－《Stranger Things》
後起之秀，新晉念力天后，細細個已有極多fans。可用念力移動物件同搵怪物，但發功一次輕則流鼻血重則消失唔見人，目前正在失蹤狀態。請佢食鬆餅可免學費。
星仔、大軍－《賭聖》、《賭俠》及《賭俠2之上海灘賭聖》
捽嘢，捽走自己啲嘢（我會揀稅單），又或者捽走人哋啲嘢。仲會教埋大家透視眼同天眼通，呢個好用呀，唔夠時可以學埋罐眠，搞到老闆有幻覺以為我有返工，同場仲有單眼佬助教，大軍。
其實仲有好多電影電視劇有講念力，例如《血腥嘉莉》、《密探睥死羊》（真人真事改編，美國真係訓練過班特工去睥死敵人）、《阿基拉》、《回魂夜》、《奪命異能》、《屍殺列車》導演延尚昊拍緊套韓片直接叫《念力》。
當戲睇下OK，但要KO試卷，都係努力啦。
