有日睇到《新紥師兄》續集重播（1985年首播），「呢個係……關禮傑？敖Sir？」原諒少年我太年輕，嗰下真係驚為天人，原來關禮傑後生咁靚仔！！！
（《新紥師兄》，最左係關禮傑，右掃就有朝偉呂方，最右係劉青雲）
今年54歲嘅關禮傑，畢業自1982年第11期無綫電視藝員訓練班，同期有咩人？梁朝偉、周星馳、歐陽震華、吳鎮宇、張兆輝，嘩！但嗰時關禮傑都有受力捧，成名作正是1984年《新紥師兄》。關禮傑飾演嘅配角喬志豪，因為性格柔弱，所以有個花名「好姐」。之後「好姐」又與周潤發、劉青雲合演《大香港》，大家熟啲嘅應該係 《絕代雙驕》、《天涯歌女》、《蜀山奇俠》。但喺95年，關禮傑因為拍咗新加坡劇集《驚天大陰謀》而俾TVB炒魷，佢被逼轉去內地發展，直到03年先以部頭合約回歸TVB，第一套劇叫《黑夜彩虹》。
（同龔慈恩合作過《大香港》、《蜀山奇俠》，關禮傑呢張相個眼神真係不得了呀！！！！！）
（89年劇集《飛虎群英》，都係飛虎隊VS黑幫嗰啲劇情，有甄子丹做男主角㗎。）
（《大香港》拍住青雲，斯文造型有陳錦鴻feel。）
（關禮傑以前拍好多古裝，同邵美琪呢套叫《飲馬江湖》，古裝都唔錯，95年離開TVB有套《小李飛刀》，隔年播埋佢最後擔正劇，都係古裝嘅《武當張三丰》。）
雖然返嚟香港後由小生變配角，但其實近年佢都幾多劇拍，11年唔再做奸角，喺《怒火街頭》做戇直警察畢直（直Sir）大受歡迎，第二年《怒火街頭2》無佢份（得第一集出得少少），觀眾仲勁嬲。另外14年《愛我請留言》黃金貴同15年《鬼同你OT》Hugo都好突出。不過最勁一定係14年《叛逃》敖Sir，一幕「世界級跳樓」睇到大家不知幾開心，突破人體極限跳天台跳到十丈遠（其實已經係飛喇嘛），騰空耐過MJ，仲幫佢整咗好多惡搞片，絕對係代表作。
（《怒火街頭》做直Sir幾好，起碼唔使成日再做奸。）
（喺《鬼同你OT》變咗鬼馬搞笑。）
（敖Sir可以，你哋都可以！其實唔得，會死人，唔好學！）
