早排睇電視,突然見到1997年的魚樂無窮麥當勞廣告,原來係麥當勞為其懷舊玩具展「麥當勞玩具樂園」所舖的路,不過就係因為咁,勾起哂大家的童年/少年回憶,所以我們特別為有癮者搵返由70's - 90's的經典廣告,唔知對你來說又有冇共鳴呢?
山西竹葉青
「今晚阿Sir請食飯!隨便坐!」「你精我都精,飲杯竹葉青。」
SUNDAY抽水廣告:
講到酒類廣告,最經典的點可以唔提由70年代尾紅到去80年代的山西竹葉青廣告?想當年殖民地時代,用洋鬼子做廣告主角的比比皆是,而呢類主角,多數仲會入鄉隨族講返幾句唔咸唔淡的廣東話,勁有親切感。為咗再加強親和力,故事背景仲用咗當年香港非常興盛的建造業(係呀,睇廣告都睇到歷史)。值得一提的是,此廣告經典到連千禧年代的SUNDAY電訊公司都抽水返拍作為自家廣告,唔知你又記唔記得呢?
余仁生鹿尾耙培元湯
「擒高擒低靠腰力靠腳力」「鋤得多,㗰氣力,消耗一定要補充。」
其實睇廣告,都可以學到保健知識,呢個1987年的廣告,筆者睇嗰年得幾歲,都唔知學到幾多嘢,例如知道原來擒高擒低係靠腰力、靠腳力。點止咁,佢仲開啟咗筆者對數白欖的興趣,大個仲同朋友一齊鬥背返出來,80年代的你,唔好扮未背過呀吓!
九廣鐵路KCRC
1993年的這個火車鬧鬼廣告,在當年引起極之大的迴響,因為有唔少人也聲稱在電視上看到多咗個小朋友,又有人話睇到多出來的小朋友七孔流血,又有說被搭膊頭的小朋友後來死了…… 而據前九廣鐵路職員在網台《恐怖在線》中透露,拍此片的導演也証實拍攝前後真的多了一個小朋友,而多出來的就是隊伍中第3個,九廣鐵路亦因此急急將廣告停播。不過亦有人說是因為剪接的關係,但若果屬實,筆者相信這可算是香港開埠以來最大型的集體撞鬼事件了。
美源髮采
「逐漸變黑又得,立即變黑晒亦得。得咗!」
曾江於70年代(講明先,年輕的我當時仲未成人形)接拍這個耳熟能詳的電視廣告,想當年還是三十有五的他又豈會預料到,廣告一播就是數十載,陪伴了幾代香港人成長,成為經典的集體回憶。不過廣告之所以長播長有,全因當時廣告商將播放權買斷,而曾江簽定的合同卻沒有標明播放期限。正因為合約的灰色地帶,令品牌可以名正言順地將廣告無止境不斷返兜怒播,播到江仔都變江伯(第日分分鐘連我個孫都曉背)。但亦因如此,即使他現已邁向朝枚之年,在我們心目中,他卻成功凍齡,年年三十五!只能講句:「黑頭曾江,無得彈!」
M&M'S
「只溶喺口,唔溶喺手!」
話說今年正值M&M'S 75歲大壽,品牌為慶祝此盛事,推出懷舊特別版,將歷代朱古力豆的經典造型重塑人前。不過講起懷舊,你又對品牌的電視廣告有何印象?如果你只能聯想起04年李璧琦同豆豆玩ICQ,甚至14年Eason擄走豆豆的版本,我只能說少年你太年輕!其實品牌於八、九十年代就出品不少廣告,當中以87年版尤其經典,皆因裡面沿用美國廣告大師Rosser Reeves那句招牌口號(咪傻喇,當然被直譯做中文啦):「只溶喺口,唔溶喺手!」題外話,其實我幾好奇大特寫靚女姓甚名誰,因為10個有9.5個網民都話呢個並唔係李婉華!(原諒我當時細到連路都未識行......)
YAMAHA
「Yamaha!」「Yamama。」「Yamaha!」「Yamama。」「Yamaha!」「Yamaha。」「係~」
九十年代初出街的通利琴行廣告,硬銷YAMAHA鋼琴但卻非常入屋。整個廣告勝在夠簡單,對白易記易上口,就咁「Yamaha!」嚟「Yamama!」去,終於第三次小朋友講得啱,日本叔叔先回返句:「係!(日文腔)」。想當年每次電視一播,大家都會跟住一齊講,真心好有童年回憶!仲有仲有,最後兩下鋼琴聲都非常具代表性,亦算得上是品牌象徵。
維他朱古力奶
「如果太多牛奶味,朱古力味冇掟企」
![](https://easttouch.my-magazine.me/main/upload/resources/resized/5775fd2f4425e/268baca9208982ea8cba50ee26c7a020baa8e98c.jpg)
常言道:「橋唔怕舊,最緊要受」,維他朱古力奶廣告就是絕佳例子,由80年代起,改了數次版本,但仍將當中的歌詞和兩隻卡通人物保留,家傳戶曉之餘不同年齡層的香港人皆有印象。廣告設計團隊自然值得讚賞,但將它推至極致的網友亦應記一功,「如果太多韓瑪莉,朱茵一定冇掟企」,與「一死以謝天華」等以明星名的惡搞系列齊名。
![](https://easttouch.my-magazine.me/main/upload/resources/resized/5775fd2c88702/97346411916e07bb53cf9e2892abadac4fa6d788.jpg)
你或者未曾用過美源髮采及黑旋風等產品,但住因香港人不論飲食還是行為上都愛「食花生」,而時興隆的萬里望花生又是花生不二之選,相信沒有人會感到陌生,姑勿論它有多鹹和有多脆,瑯瑯上口的廣告歌詞,使每當看球賽波、唱卡拉OK甚至口痕亦會有一包萬里望花生相伴,陪着我們成長多年,只能如時興隆廣吿裡的小女孩般說聲「謝謝」。
早於1990年,本港已實行禁止電視台及戲院播放煙草廣告,所以新一代應該會不熟識,但至少會聽過「讀萬卷書不如食萬寶路」,可想像當年萬寶路風靡全球的境況。此香港版本的廣告,沒有「粗獷、獨立而又自由奔放」的經典牛仔角色,但一樣不失電影感,更在尾段輕輕留下祝賀句。
地點:太古城中心二樓中庭、中橋及5樓
時間:11am-9pm