是的，《TOUCH》編集部展開了一連五日的《2016年 IN & OUT預覽》，來到《第三回》繼續無定向為你主觀報導來年時興In潮流和過氣Out之事與物⋯⋯
-IN-
1.石紋設計
上年年尾興盛大理石紋，各高階時裝品牌如 Maison Margiela、 Alexander Mcqueen、Alexander Wang和 Carven等於近季系列均相繼注入這種石紋元素，此番紋理更擴展自藝術品、室內設計和電子副產物等等等，人氣keep住高企，因此2016年頭此風應延續下去，並預計今年連帶各種石紋質材都會一同上位。
2.畫家帽
Snapback、Baseball cap、鴨咀帽（golf cap）和 Beanie等帽款已經相繼佔據頭頂上的潮流一陣子，係時候到久未露面的畫家帽了吧。在韓風橫掃的狀況之下諸君要跟上潮流都要睇睇韓風的頭子，而於韓潮流界的各代表已各自於《人氣歌謠》上帶上畫家帽子示人。即係韓星指定著用東西根本冇得唔興，係咁。
EXO隊長suho同金有貞係12月時上《人氣歌謠》都帶住。
 |
 |
 |
 |
 |
姐姐係KPOP見到但唔識佢地係咩組合，總之佢帶住畫家帽！哦，原來係少女時代子團TaeTiSeo。
3.摺大番褲管
roll褲潮流roll了幾個年度，都係時候說再見。2016上位摺褲管法則第一條：一摺大番褲管！摺一大摺褲管於各大街拍漸露頭角，重點係一：「摺一下」同二：「好大摺」，相信能在本年度的褲腳潮流佔一席位！同樣地，GD亦已率先摺大番，冇得唔興X2。
 |
 |
4.slogan白波襪
白襪於上年頭開始盛行，以運動大牌logo加持的白襪算是2015年的主軸，今年白波襪繼續有景，但卻變奏成盛載slogan的載體，繡上 quotes/ slogans的白襪將於今年橫行，切記著九分褲或短打或摺大番褲管去顯露你白襪上的訊息。
 |
 |
 |
5.竇靖童
自上年開始首次參與日本音樂節被視為正式「出道」，再於clockenflap初番亮相香港的Leah 竇靖童乃是歌后王菲與音樂人竇唯之女。剛過生辰踏入19之年的她，年紀輕輕已廣受關注的原因除了是王菲的女兒外，更是日本名模水原希子的閨蜜，兩子更常於個人instagram發佈四處玩樂的照片，真係上一輩姨姨們同時下年輕人們都會留意的人物之一，2016真係全世界都keep an eye on her喇喂。
同水原希子好老友喎。
竇靖童instagram：@grey_waters
圖片來源：竇靖童instagram
6.Lily Rose Depp
都好難有人唔識Johnny 「Deep」個囡囡 Lily Rose Depp，作為型佬星爸和名模母親的女兒，自出娘胎已被關注，近年剛進入青春之期的16歲Lily Rose更被老佛爺Karl Lagerfeld邀來參與CHANEL 的眼鏡系列拍攝造型照，亦為其model事業打響頭炮，而她也曾為多本雜誌拍攝造型，如Vogue Paris及Oyster Magazine等，再加上她與一眾名人相當友好，如Victoria’s Secret名模Stella Maxwell、名星Rita Ora及Will Smith個女 Willow Smith等都與Lily Rose好friend底。總之被 Karl爺加持過都好難唔紅，Cara Delevingne 就是個好例子了吧。
Lily Rose Depp instagram: @lilyrose_depp
7.Line Tattoo
近排韓國興起一陣女生紋身熱潮，但重點在「小、幼、單線」，所有大範圍，浮誇及色彩繽紛的一律out out out，而且大部份會紋於手指間、耳背，腳眼等不顯眼位置。就係要冇人留意到先叫有型，女仔紋身唔係為咗俾全世界睇嘅，你估我係Justin Bieber呀句號
 |
 |
8.女權當道
潮流人類都可以關心政治。2016將是女權當道之年，先有昂山素姬率領的反對派於緬甸11月的國會選舉取得壓倒性勝利，又有德國總理默克爾登上《時代》雜誌年度風雲人物，以及即將舉行的台灣總統大選中，暫時呼聲最高民進黨候選人蔡英文，預計將成為台灣第一位女性總統，還有希拉里再度挑戰2016年尾的美國總統選舉等等等，都見2016年女性將在政治層面之上參上重要的一腳，女權入流繼續。
 |
 |
 |
 |
9.頂上分界
油頭all back說了再見，連許廷「鈞」同胡鴻「鏗」都跟MK厚蔭永別了之後，最新潮流髮則：分界！其實各大韓國組合的仔仔們已經率先分界示人，但老老實實除咗GD分到正中五五界外，香港男生中分大部份都只可得到心理變態的評價，因此5.5/4.5或者6/4分界相信會較為港人所接受，所以男生要緊貼韓流就要努力學習如何吹好個頭部了，因為分界首則要吹起啲蔭，吹出個孤度來，否則就咁純分界會變成半澤直樹，fail。
|
|
 |
韓仔有孤度吹法VS半澤直樹
10.Tuck in the shirt
又是一個欺負人的潮流，要「攝」衫攝得有型而不失霸氣，老實說表者只有喬布斯。但奈何今年興tuck in，因此建議攝衫時要搭配高機能sneakers或爛腳牛或闊褲etc，同埋最好攝樽領，執生啦。
 |
 |
-OUT-
1.Roll腳
要roll都roll了幾個年頭的褲腳係時候離開了吧，隨著9分褲、闊褲、摺大番、爛腳牛等產物出現，roll腳應該，唔係應該，係「要」完了吧如無意外。
窄腳仲roll褲好恐怖呀。
2.文青流儀
是的，並非刻意歧視文青此塊，而是想說今年不再興靜態文青，文青流儀將轉換成動態版，文青分子將不再靜靜地坐cafe睇書攝影來渡日，反之而以行山等動態活動所取代，即係，就算影靚相都要行上山上影！帶氧系文青，我改嘅。
*自己上Facebook 睇你前後左右的朋友係咪post好多行山相就明啦 I love Hong Kong.
圖片來源：Lam KY
3.Cara Delevingne
英國名模Cara Delevingne 自前年被 Karl爺加持後知名度從此衝上雲宵，加上有個歌手女友 St.Vincent同明星好友ssss Taylor Swift、Rihanna、Selena Gomes，遊走於時尚圈子，但繼Karl爺放眼Lily Rose Depp後，Cara熱潮隨之減退。加上她亦講到明要離開model界轉投電影圈，掛住拍戲應該難以保持一定曝光率了吧，out。
其實Chanel SS16 Fashion Show仲有一齊行嘅。
4.窄腳褲
問世間有幾多港仔可以駕馭窄腳褲？係的，今年闊褲都應該差唔多水尾，但都唔代表窄仔會回歸，相反會被直腳褲管取替，配上摺大番或爛腳仔，物極必反大定律呀，唔闊亦唔窄，係咁。
5.壁咚
根據百度百科的說法，（請以普通話朗讀）「壁咚」（壁ドン），日本流行語，是時常出現在少女漫畫或動畫以及日劇當中的動作。男性把女性逼到牆邊，單手或者靠在牆上發出「咚」的一聲，讓其完全無處可逃的動作⋯⋯下刪一萬字。由上年某日開始便於世人的臉書上瘋傳的此兩字，但係我深信你今時今日再問人呢兩個字點寫，應該都唔會有人類可以立刻回答，仲唔out我跪！！！！！！！
「壁咚」求你過身吧。
6.Champion
我講日版。香港買唔到潮流之子唯有轉投ig shop幫手代購的champion上年真係不得了，見一眾港仔女以champion衛衣/ T-恤搭配各款sneakers如Huarache、pump fury和stan smith等等等橫掃各大院校，不過今年Fila、Reebok等相繼歸位，睇來Champion 要行埋一邊了。
7.中式 Jacket
由滝沢伸介主理的NEIGHBORHOOD於20周年推出的系列中可見大量中式元素的產物，其中以棉襖作出變奏的外套款式最為著目，不少潮人都入手一件，但到今年入冬後都沒再見影，所以要out。留返新年嗰時扮插班手甲用啦，同親戚拜年時記得做C字手勢呀。
8.陳慧琳
42歲之齡開《花花宇宙 X 薰衣草》演唱會，仲叫埋仔仔上台say hello，成套《愛回家》擺在紅館，Kelly那種令人慘不忍睹，不忍直插「佢啲歌真係愈來愈難聽」的莫名的心情直教人心中穿洞，啡白的文章就完全講中我們這班由小學雞開始睇kelly大的心聲，click入此link詳閱就知點解陳慧琳這個「brand」過氣了：https://www.inmediahk.net/node/1039725
圖片來源：星島日報
9.Rick Owens
Rick Owens要out？！錯不在佢本人或品牌本身，而係著用它的明星們。well，你問我係香港Rick Owens =邊個？我淨係諗到林峯同XPX，但其實蘇永康同時裝終結者黃宗澤（我諗佢個breast fd 鄧智偉，TVB御用音人，彈琴彈到暈掉個位都應該好鍾意 Rick Owens）都曾經「俾面」著用過，再咁落去⋯⋯真係不敢恭維，不過好想睇林峯著FW15個套露 bird裝就真嘅。
Rick Owens本尊與模特兒，唔好話佢聽鄧智偉同Bosco著佢啲衫呀。
10.Donald Trump
美國總統選舉的共和黨候選人 Donald Trump特朗普自從宣佈要參選之後，撇除他的完美金髮外，其出位言論也廣受批評，我們不能否認此君對房地產的認知和他在商界的地位，但其狂妄自大的氣場惹起不少美國人類不滿，而家佢要勝出共和黨總統候選人的選舉都危危乎呀，入主白宮？執笠唔該。No way~ trump trump, see you next time.
 |
 |
