稍為有留意韓星的朋友，相信絕對不會對此類口罩陌生，無病不會呻吟，但口罩要戴，皆因一罩遮三醜，落機、素顏、暗瘡等都無有怕，再加太陽眼鏡的話，生化危機般的世界末日亦捱得過。韓流高峰期並非新鮮事，可能你會說眾人皆醉我獨醒，盲目跟風非我等潮輩會做之事，但現時又是流感高峰期，洗手洗手之餘，口罩當然要有，另外，早於14年Supreme和A Bathing Ape已釋出自家的口罩，Givenchy的2017春季亦會有logo口罩，種種因素底下，不論你像張偉健一樣只想身體健康，或者單純為型都要入手。Sorry，差點忘記還是grad trip的季節，同學們買個口罩扮一扮韓仔啦。




  －功 能 先 決－

PITTA mask（$60/ 9WULA）

 

雖說是裝型之物，有額外實際的功能就當然最好，此類口罩由韓星帶起，但將它推到極致，始終要靠「㗎仔」。以PITTA釋出的口罩為例，外觀看似出自韓國東大門的街邊貨，但其實暗藏玄坤，防菌又防敏感，更能過濾99%的花粉及塵埃，無縫的設計更解決口罩帶對耳朵造成的不適，特製的布料允許用家清流3次，兼不影響過濾功能的發揮，最貼心的是它的拉鏈包裝，方便保存又衛生，另外，除了有灰和白兩色任君選擇外，亦有S碼供小臉之人，大概日本品牌都如此心思細膩。


Nexcare舒適口罩（$30.9/ HKTV mall）


3M的出品，口罩上有雞乸咁大的logo，比沙士時期使用的時尚得多，但總是覺得又比日本的差，價錢還要更貴，勝在顏色和碼數選擇較多，一樣可以清洗再用，以保暖防寒材質製成，更抗濕氣不易滋生塵蟎。

SHOPLIST：


9WULA

旺角百利寶商業大廈19樓8室/ 6607 8007