「遲唔會遲，早唔會早，時間啱啱好！」上世紀80年代樂都錶經典廣告標語，關鍵重點在於「啱啱好」，好多嘢恰巧剛剛好就已經足夠。差之毫釐，繆以千里，於自以為最好 / 啱嘅時間遇上啱嘅人，愜意精絕！

正如創立於1848年，在20世紀60至80年代黃金時期成為關注焦點嘅一代經典OCTO樂都錶，今個夏季正式宣告回歸，Timing與現今時計潮流大方向呈剛剛好狀態！特別製作復刻「Missilemaster」嘅Ref.1016（日曆自動上鏈）、一體式錶身設計嘅Ref.1119（自動上鏈）、具備時、分、日期及國際時區顯示功能嘅Ref.3003（世界時間石英）三款全新型號腕錶，設計忠於其黃金年代風格，復刻上世紀典雅美學，彰顯製錶歷史與經驗，展現出舊裝錶獨到氛圍，向上世紀70、80年代精鋼腕錶熱潮作出致意，各限定200枚，每一枚腕錶背面皆刻有獨立編號，只此一枚，永遠不再生產。當中刻意沿用上一代觸感較為溫暖細膩、重量較輕嘅膠鏡（Acrylic crystal），有別於現代腕錶錶鏡多使用玻璃或藍寶石水晶材質；另外採用標誌性傳統片帶設計，傳承製錶業內幾近失傳嘅工藝，現今仍懂得操作技術嘅工匠或具有可用嘅設備實屬極罕有！