3月香港勁多藝術展，就算你剩係識條鐵，都可以去感受一下大師嘅藝術味。嚟緊奈良美智有全新展覽，但點只畫畫咁簡單，今次佢喺中環佩斯畫廊舉行「奈良美智：陶瓷作品及其他」展覽，名正言順咁呈現佢最新創作嘅陶瓷雕塑、繪畫同紙本。睇完起碼同人講：「我去睇奈良美智嘅陶瓷呀！」個人即刻Deep咗，有深度咗好多！

今次展覽以12個新陶土雕塑做基調，全部喺日本歷史最源遠嘅陶鄉之一「信樂」創作，呢個地方亦係奈良美智重新開始創作嘅地方。展覽中展出嘅幾件雕塑新作，展出之後就會送到台灣，參展於9月起舉辦嘅陶瓷雙年展。

就住今次展覽，奈良美智就話：「自從我10年前初次接觸到陶土之後，陶土對我來說，就變成介乎繪畫同隨筆之間嘅創作媒介，尤其是陶藝製作中某種積極的讓步，等我可以肆意完成創作，接受燒製過後，可能比我可控範圍更好或更差的成品，感覺非常好。最近我更意識到，陶土比鉛筆更自由，相比使用鉛筆、筆刷一類的工具，用雙手直接進行創作，是一個更原始的天性。」

【奈良美智全新個展「陶瓷作品及其他」】

日期：3月27日至5月12日

地點：中環皇后大道中80號H Queen's 12樓佩斯畫廊