ROLEX釋出嶄新Deepsea Challenge首款全鈦（RLX titanium）腕錶！全名ROLEX Oyster Perpetual Deepsea Challenge靈感源自於2012年3月26日伴隨電影製作人兼探險家James Cameron歷史性深潛至馬里亞納海溝 (Mariana Trench)（10,908米 / 35,787呎）所攜帶嘅實驗型腕錶，代表勞力士潛水錶世界一個新里程碑！
當年伴隨James Cameron深入馬里亞納海溝嘅實驗型腕錶以904L鋼製成，縱使冇受到深海壓力干擾，但仍因重量問題唔方便佩戴喺手腕上面，故今回Deepsea Challenge選用RLX鈦金屬製造錶殼與錶帶，RLX鈦金屬係由勞力士甄選嘅5級鈦合金材質，具備輕便、堅固、抗腐蝕特性，至於改良後嘅腕錶重量顯著減輕，相較於原款實驗型腕錶輕盈30%。另外除錶冠護肩外，錶殼與錶帶飾有清晰搶眼磨砂紋理，而錶耳邊緣磨光，折射出淡雅光澤；腕錶具備三重緊鎖Triplock系統，RLX鈦合金錶冠皇冠下以兩點中有一劃為記；RLX鈦合金鏈帶配備以2mm微調，最長可延伸至20mm嘅Glidelock延長系統及即時加長26mm嘅Fliplock延展鏈節，總計46mm變通彈性方便將錶戴喺7mm厚嘅潛水衣外圍。錶身直徑50mm，厚度23mm，比實驗型鋼錶薄5.2mm、小1.4mm且輕128克，僅重250克！
腕錶搭載問世於2020年新一代整合一體Chronergy擒縱系統自動上鏈3230型機芯，以鎳磷合金製成並獲得專利，不受磁場干擾，動力儲備約70小時，獲COSC認證之外，更通過勞力士內部極嚴格檢測，係每日快慢於正負兩秒內嘅頂級天文台精密時計。沒日子顯示，9時位置配備自動排氦閥門，供飽和潛水專業人員回水面時排除錶內積聚氦氣，加上搭載專為抵禦深海水壓而設計嘅專利Ringlock系統（結構由三部分組成：較厚圓拱形藍水晶鏡面、氮合金鋼壓力環以及RLX鈦金屬底蓋），保證防水深達驚人嘅11,000米（36,090呎），係目前Deepsea嘅三倍！勞力士與Comex（Compagnie Maritime d’Expertises）公司緊密合作，建造特製高壓艙，以測試Deepsea Challenge腕錶防水性能。每枚腕錶均按潛水錶標準，經過嚴格防水測試與檢測，還額外增加25%保證深度，意味腕錶能夠承受相當於水下13,750米（45,112呎）嘅巨大壓力！（售價HK$203,200）
21:11:36