總嫌Old money style太過正經八百，像個滿身「財」氣一身銅臭正襟危坐嘅老調兒，始終，呢個時代，實際需要多一點幽默玩味吸睛亮點吧！
由一對藝術家＋驗光師夫婦Anne和Valentin於1984年法圖盧茲創立嘅自家眼鏡店 / 品牌Anne & Valentin，所製作嘅眼鏡就以突破常規顛覆眼鏡設計美學、融合法式浪漫與幽默元素新鮮感而揚名，彰顯出佩戴者不一樣嘅個性 / 氣質！
創立四十年以來，品牌堅持法國純手工製造，嚴選來自世界各地頂級素材如法國與義大利醋酸纖維板材、德國製零件、日本鈦金屬，製作出別具創意獨特鏡框設計＋大膽搶眼繽紛顏色＋混合素材組合嘅驚豔眼鏡作品，於技術、舒適度和創意之間取得平衡，延伸出多個不同風格嘅系列，如令人會心微笑、充滿層次及漸變色彩效果嘅CRISTALLIZED、滿載金屬感紋理嘅ONDULO、憑藉「Less is more」為主軸簡約純粹極致嘅MINIMALIST，又或注入最緊要嘅Fun趣味性、幾何結構、建築美學等，總之提供可能性、可塑性、容易Mix & Match多選擇。
當中得知設計靈感Inspiration / Moodboard / Reference名單中擁有設計師、藝術家們如雷貫耳巨擘名字如Dieter Rams、Jean Prouvé、Piet Mondrian等，立即明瞭品味 / 口味對位這回事。而且大玩名字遊戲，充分體驗其名字學、改名藝術，好似系列名稱如ARIGATO、HAHA、HOHO、FORYOU、WELLSAID、VIBES、PUNCHLINE、FANCY，觀其名開宗明義，照字面完全表達所思所想定位，又或需要加啲想像力好似估歌仔咁解密解碼，如CODE、BYRD、ABBY、RECORDS，大概與音樂相關吧，有意思！
