藉着轉冷嘅日子，最先浮上心頭，總會係熱烘烘嘅火鍋！好應該與新知舊雨相聚一堂共進一趟羊腩煲，觥籌交錯，風花雪月，對酒當歌，人生莫奈何？！
不時不食，到「山止川行」大快朵頤羊腩煲前，先品嘗前菜如蔥油餅、尖椒皮蛋、蒜泥白肉，醒一醒胃，再來一客川椒風味小龍蝦，蝦肉 / 蝦膏鮮味提振味蕾；清酒係時候出場！特選山形縣奧羽自慢，配搭小龍蝦賦予另一層次滋味，略微酸性果香口感，舌尖反覆平穩而纖細爽朗地回味。
酒酣耳熱之際，直入大道，採用精選黑草羊製作嘅秘製羊腩煲，師傅透露當中柱侯醬經過多次嘗試調配到最適度，啖啖炆得腍嫩、不腥不羶嘅羊腩肉，賦予支竹、馬蹄、大蒜，再蘸秘製腐乳醬，提升香濃度到另一新層次，冬天食羊腩煲別有一番風味，因為黑草羊含蛋白質、脂肪、維生素及鈣、鐵、鋅等多種營養素，暖胃又暖身 / 補身之選！
當然，嫌羊腩煲燥熱，師傅一早已經預備咗竹蔗馬蹄茅根汁、山渣水俾大家下下火；隨後伴著生菜再上來一盤肥瘦得宜嘅牛小排，於滾燙羊腩汁中涮一涮，締造濃滑牛味＋騷香羊湯完美混合效果；最後嚟到尾聲，以荳沙鍋餅與手本甜品流心黑糖糍作為甜蜜總結，大滿足！
山止川行
銅鑼灣渣甸街66號亨環2樓
2152 3290
