一個樂而忘返嘅展覽，難得！
表面上係一間玩具店，但又勁似紙紮鋪，入到去心裡面會有好多糾結掙扎，幾個架擺滿晒一盒盒Figure，買唔買Boba Fett好呢？定係入手攞住M記紙袋嘅白兵、黑武士、高達模型？啲公仔歪歪斜斜，用紙板人手整出嚟，完美主義者見到好頭痕，卻又令人回溯當年扭計叫阿媽買玩具嘅情景！而且，好多CCTV睇住㗎（都係紙板嚟），又會有個著住（好靚）制服嘅保安人員突然粒聲唔出失驚無神遞上張寫「HEY」字樣＋Barminski簽名紙張，即刻手心冒汗！
笑住入去，笑住出嚟嘅展覽，Barminski「Moon Lands On Man」（即日起至9月17日），作為慶祝紀念香港JPS畫廊開業10週年嘅首部曲，盡情展現真真假假，虛實之間嘅玩味界線，Why so serious？！憑藉藝術家Barminski（Bill Barminski）揚名紙板雕塑，締造出真實又虛假，可遠觀而不可褻玩嘅玩物 / 藝術品，包括星球大戰、咸蛋超人、高達、哥斯拉、太空人等，明明標示著「Do Not Touch」，但就愈想親手掂，其實有啲係展品，有啲係可以買嘅玩具（就係想營造「好亂呀」嘅觀感），而且歡迎大眾拎上手觀賞，會發現好多手作仔、手繪、Low tech / Lo-fi細節！
玩具店後面，有條暗黑神秘職員專用通道，經過公共電話亭＋CCTV（老是常出現，監察監視監控不言而喻），就會走入另一個大觀園、出世 / 入世外桃源，以Barminski最撚手嘅Low tech / Lo-fi紙板搭咗一個NASA太空 / 地面指揮中心（亦仿如置身國防部禁區「51區」），控制室無論張櫈、可樂、薯片、香煙裊裊扮燃點緊嘅煙絲火花等，都係手作紙板，好Raw又窩心！
一直盛傳美國太空人登陸月球條片係由Stanley Kubrick拍㗎，而Barminski就整咗個拍攝場景出嚟（當然，全部包括滅火筒、攝錄機、香煙都係紙板），就係想反諷陰謀論者，現實世界誰是誰非（重要咩）嘅態度，唔好盡信眼前 / 表面嘅所謂真相，剛好近日正疑似證實Non-human beings / Aliens嘅存在，成件事好夾！
聽住Travis Scott關於烏托邦嘅最新專輯《UTOPIA》，對比Barminski嘅Dystopia反烏托邦，都係隨緣玩世啲好！
1962年出生、自學嘅藝術家Bill Barminski，最廣為人知係佢於2015年參與過Banksy策劃嘅Dismaland反烏托邦主題公園（互動Security Theater裝置藝術），另外佢係Absolut Artist billboard series嘅一份子，曾經致力於製作Gnarls Barkley、Death Cab for Cutie、Kid Cudi嘅動畫MV，為Baz Lurhman嘅Sunscreen Song效力製作動畫，亦與拍檔Chris Louie於2014年為新媒體製作歌劇《The Cunning Little Vixen》創作美術、佈景設計和動畫角色。
JPS GALLERY
中環皇后大道中15號置地廣塲中庭2樓218-219號舖
