聖誕系列？係呀，過完萬聖節，又係時候迎接聖誕喇。唔駛多介紹，請另一半食Lady M，簡直係身份象徵，全新推出抹茶味蛋糕，同每年聖誕節限定推出嘅經典紅絲絨滋味，一紅一綠迎接聖誕，加埋限量版蛋白脆餅朱古力套裝，男士們識做啦！
食過Lady M就知，朱古力棋盤蛋糕係皇牌蛋糕，聖誕推出變奏版「抹茶朱古力棋盤蛋糕」，喺外層均勻加一層抹茶白朱古力醬，切開嘅就係抹茶同黑朱古力海綿蛋糕砌成嘅小方格，好睇又好食。至於聖誕節期間限定嘅「紅絲絨蛋糕」，今年仲選用3款法國星星形朱古力做裝飾，蛋糕面層撒上糖霜，雪地觀星咁樣樣，一個字：浪漫。件裝蛋糕喺11月6日（星期一）起全線Lady M蛋糕店出售，想要原個蛋糕呢，就要等到12月份喺官方網站訂購喇！
略嫌蛋糕無咩新意？Lady M特別為冬日設計嘅限量版「Lady M蛋白脆餅朱古力套裝」，外盒設計以雪地小屋為靈感，保留雙層玻璃杯同朱古力球，仲有聖誕樹形狀嘅盒仔，入面就係手造粉紅同粉藍雙色蛋白脆餅，大家又可以加熱牛奶變成一杯熱朱古力，加埋蛋白脆粒，聖誕節暖在心頭呀！
