蘭桂坊Crossover日本？好似大纜都扯唔埋，但係今次就索性扯埋一齊，「蘭桂坊日本嘉年華」將會喺11月11至12日，由晏晝1點直至深夜舉行，周末狂歡！今次，傳統日本祭典元素更加殺入蘭桂坊，呈獻正宗秋祭氛圍，有超過40個日式美食、清酒同燒酎攤位，仲有勁多活動！
講明日本祭典元素，到時蘭桂坊會有巨型鳥居同天燈裝飾，可以免費試穿和風浴衣，仲可以同祭典入面嘅特色青森睡魔祭大型燈籠合照。活動方面，祭典有魔術表演、現場樂隊演唱、日本傳統祭典舞蹈、忍者、空手道、劍道、武士舞台表演，同埋難得一見嘅德島縣著名藍染製品時裝表演。仲仲仲有和風音樂、舞蹈集於一身嘅太鼓巡遊，大家千祈唔好錯過日式臉部彩繪同專業髮型設計。最後講多樣，現場仲有任天堂攤位，電玩迷必到！
【蘭桂坊日本嘉年華】
日期：11月11日至12日
時間：下午1時至深夜
