「香港電影海報教父」阮大勇，你未必知道係邊個，但係佢畫筆下嘅粒粒都係天王巨星！嚟緊佢將會喺尖東嘅星光花園，舉辦「星光魅影」作品展，展出24幅佢筆下嘅巨星肖像畫作，唔係天王巨星都唔可以上榜，其中超過20幅更加係首度公開展出，包括李小龍、梅艷芳、張國榮、Angelina Jolie等等，同時佢亦都為今次作品展，全新繪製成龍、劉德華同劉青雲嘅畫像。
阮大勇嘅作品，無論電影海報，抑或肖像畫，總數超過200幅，喺今年舉行嘅香港電影金像獎，更加獲得最高榮譽「專業精神獎」，舊年亦有佢生平事跡嘅紀錄片《海報師：阮大勇的插畫藝術》，所以大家去尖東睇巨星肖像畫之餘，記得要認住呢位對香港電影好大貢獻嘅阮大勇老師呀！
【阮大勇「星光魅影」作品展】
日期：9月30日至明年3月
地點：尖沙咀梳士巴利道星光花園
