老實講吖，就算佢真係改名，其實都係我哋一早走先啦。你記唔記得由幾時開始你個主頁由Yahoo!變成Google？記唔記得幾時開始，常用嘅email都係gmail.com而唔再係yahoo.com.hk？仲有，幾時由用Yahoo!字典變成Google翻譯？不過，同時我都記得以前成日喺Yahoo!拍賣必過好多好嘢，又有同事沉迷過去Yahoo!知識答問題賺積分......但其實最重要係咪誤會，你用緊嘅Yahoo!服務都冇改名嘅打算，當然，我都知挑起咗集體回憶條筋係好難拉番鬆嘅，所以請繼續睇落去。
講開又講，呢張圖我都係用Google搜尋Yahoo!嘅圖片搵到嘅。
嘩好大個集體回憶呀！我開頭聽到都係咁嘅反應，但再搵資料，其實Yahoo!被美國電訊商Verizon以48億美元收購近日接近完成，當中收購嘅項目包括搜尋引擎、電郵、網絡等核心業務，短期內亦冇打算改名，改名嘅是出售後剩低嘅資產，包括來自Yahoo!嘅阿里巴巴集團控股有限公司同雅虎日本股份。而改嗰個名Altaba，據說是Alternative及Alibaba的混合，網民話即係「阿里他爸」。
簡單點說，即時暫時對我們日常用Yahoo!服務沒甚影響，你都係會見到Yahoo!下面寫住雅虎香港，click右上角個信箱就入到去收email。
我們最有印象嘅Yahoo!功能回帶：
Yahoo!電郵
當年啱啱興起互聯網，真係人人都有一個yahoo.com.hk電郵旁身，不過之後又出現好多選擇，又有啲大容量啲，又有啲快啲，最後你可能依然都保留呢個Yahoo!電郵，但而家用得最多嘅未必係佢。
Yahoo! Blog
你都可能曾經諗過自己可以做Blogger(而家多數叫KOL)。咁有冇喺Yahoo!Blog開過戶口？呢部份一早離開咗我哋，2013年12月26日，Yahoo!宣佈把Blog服務全面關閉。
Yahoo!搜尋引擎
以前我哋真係成日用Yahoo!嚟搵嘢，不過而家你哋係咪多數都係用Google？可能香港用Yahoo!嘅人減少緊，不過據知日本依然以Yahoo!最強，所以如果要搵日本嘢，都係去日本Yahoo!啦。
Yahoo!拍賣
曾經必過唔少嘢，而且都會上去搵吓有冇好嘢，不過多數已經被代購、店舖等佔據。不過又係嗰句，去日本Yahoo!依然好多好嘢拍賣。
Yahoo!知識
我冇乜點玩過，不過有時喺網上搵嘢，都真係見到好多人喺呢一欄中問過嘢，又真係好多人會答，又最佳答案又盛。而且有同事話佢以前都沉迷過喎，答得好會獎分，多個銜頭，虛名嚟。仲有，記唔記得出現過被網民稱為「知膠」嘅人？即係亂問嘢嘅，其實幾好笑。
Yahoo!字典
以前上網查英文都會用Yahoo!字典，不過而家無論查英文、日文、意大利文，都係會用Google翻譯，雖然我知都唔係靠得住......
Yahoo!遊戲
當年好多經典遊戲，即click即玩好方便嘛，返緊工玩兩舖都唔覺。當中又以桌球應該好多人玩過，仲可以用間呎度呢個秘技。
