小動物無分國籍品種，全部都單純可愛，不過喺日本，可能貓奴特別識包裝，而且加埋靚景靚攝影，隨時係出版最多貓貓寫真嘅國度。今個月爆紅「野良猫 ニャン吉」出新寫真，又可以睇睇訂閱人數55萬嘅Maru，勁過好多所謂人類YouTuber呀！仲有，懷念吓已故嘅貓站長、曾經同婆婆相依為命嘅白貓福丸。
流浪貓變旅行貓「ニャン吉」
佢喺facebook又寫日文又寫中文，所以香港都應該好多fans。「野良猫 ニャン吉」成日出外景，又草地又海邊又火山前，去旅行多過你同我。嚟緊今個24日喺日本就會推出新寫真《旅猫ニャン吉 写真集 – どんニャときでも笑う門には福来る！》，1,404円。
facebook
https://www.facebook.com/noraneko.nyankichi
相撲手隻貓唔太肥
呢兩隻貓Moru、Mugi，特別之處就係喺日本一間相撲部屋度住，兩個都係俾前主人遺棄，所以一班有脂肪又有愛心嘅相撲手就收留咗佢哋啦。早前出咗一本《相撲部屋の幸せな猫たち》，睇喵之餘睇埋愛心相撲手，相比之下，兩隻嘢唔算肥。
資料來源
https://libre-inc.co.jp/special/arashiobeya-neko/
永遠懷念和歌山貓站長
講到喺香港最紅嘅日本貓明星，一定係呢隻和歌山電鐵貴志川線貴志站嘅貓站長「たま駅長」，不過16歲嘅佢喺上年6月離開咗我哋喇。而家由佢個friend「ニタマ」繼任成為「たま二世駅長」。如果去車站探佢，大把精品同寫真可以買，已故嘅小玉仲有個神位呀。
官方Twitter
https://twitter.com/ekichoTAMA
農村婆婆與白貓
呢個諗起都心酸。喺日本鄉村生活嘅婆婆「みさお」，之前同呢隻雙色瞳白貓福丸「ふくまる」相依為命，由日本攝影師伊原美代子幫佢哋影低好多生活相，出過一本《みさおとふくまる》寫真，超溫馨。不過11歲嘅福丸喺2015年因為因為慢性腎衰竭又離開咗喇。婆婆同福丸嘅故事開端，係婆婆2004年時喺倉庫見到佢而收養咗佢，之後就日日一齊生活喇。
facebook
https://www.facebook.com/IharaMiyoko/
Maru日本超紅YouTuber
名為Maru，蘇格蘭摺耳貓，佢喺2008年開咗YouTube頻道，嚟到而家已經有接近55萬訂閱者，影片瀏覽數仲超過3.3億次，真係紅過好多網絡紅人。佢成日都會有新片出，同佢個friend Hana穿吓紙袋賀吓年，又話10幾萬個views喇。
Mino出名瞓得醜
呢隻唔係賣靚樣，真係唔怕醜活出自信呀！不過講緊係佢瞓覺個樣啫，一瞓著，又反白眼又伸脷，但瞓醒時都好可愛嘅。佢之前出過一本《日本一寝顔が酷い絶世の美猫セツちゃん》，被出賣睡相。
Twitter
https://twitter.com/setsunegao
