為咗推廣廣東話，呢份稿我會用口語寫。
Ben Sir真係前無古人，竟然可以喺大台炒蝦拆蟹講咸嘢，喺呢個提下老母都有機會俾人話無禮貌同講粗口嘅年代，估唔到我喺TVB會聽到「XX老母蓋世寶」，仲要多過兩次，欽敬欽敬。
其實粗口「笨」唔可怕，最可怕係你覺得佢可怕。多得Ben Sir，呢啲別人心目中嘅污糟蠟塌嘢，終於上到台面，仲昇華到學術研究、文化承傳。
成件事，好聽過粗口，啪啪啪啪啪（呢啲真係拍手掌聲）。
要尊重十半呢個時段
Ben Sir真名叫歐陽偉豪，唔單止係文學士，仲係哲學博士，正職係香港中文大學中國語言及文學系高級講師。起初識佢係因為《學是學非》，心諗呢個大學教授都幾搞笑，上電視做節目教中文，仲會扮鬼扮馬，又古裝又神探伽利略。今年TVB喺十半時段，開咗個《男人食堂》，搵許紹雄、金剛、梁烈唯講下淫嘢，好大膽，點知最爆竟然係穿插當中嘅小環節，由Ben Sir主理嘅「粗口學堂」！片段當晚已經喺網上瘋傳，「其實係有個同我拍過《學是學非》嘅PA搵我做，既然大台都夠膽，咪試下囉。」結果紅咗Ben Sir、紅咗拍手代替粗口，「本來諗過用『嘟』，但電視又『嘟』我又『嘟』無咩新意，不如拍手，有啲動作睇下。」至於嗰啲衰衰格幽默感，係Ben Sir同中學同學互塞訓練出嚟。有人鍾意，但同時又有道德「啪」覺得佢cheap，「我想引下人笑咋，拎自己做實驗試下大眾底線， 如果大家唔鍾意，我可以做返《學是學非》，但人哋俾得十半呢個時段你，你要尊重。」 最終人哋有埋自己節目《Ben Sir學堂》，觀眾想要咩，大家明啦。
高登仔好有前瞻性
Ben Sir教廣東話同粗口其實好有經驗，喺大學打滾多年，一早知咩題目會捉到大家注意力：粗口同風月片，但係無諗過會爆到咁，「估唔到咁快有自己節目。」大家應該都睇過《Ben Sir學堂》，講蒲，講口水歌，講廟街文化，星期日晚上十半，TVB變得有種咸咸地本土味。Ben Sir都好肉緊自己處女作，一嚟就問我覺得點，老實講幾好睇，啲料豐富到嚇親人，我話感覺到製作過程應該幾嘔血。「呢個嘔血感覺，都值得你用一句粗口形容下佢㗎。」Ben Sir話要俾返啲credit TVB，因為題目、故事、嘉賓係佢哋諗，Ben Sir再整理資料，令講解變得有趣，但第一集份稿已經有廿頁紙。「高登仔有句好正，『第一集都出晒最好睇嘅嘢，第二集會悶』，佢哋好有前瞻性。但詞語節目真係好難做，個節目好搏，我都估唔到佢哋剪到咁明快，又有晒graphic。唔通我搵劉華做嘉賓咩，就算係我都要不停講。暫時我哋簽咗13集，之後做唔掂，咪開劇俾我拍囉，哈哈。」佢話自己可以做喜劇，唔好除衫，因為佢個形象係正正經經喎。
用廣東話創造價格
講到拍劇，其實Ben Sir幾好演技，最緊要夠放。今時今日教粗口教到人氣急升，真係多咗好多機會，之前已經幫過PlayStation拍VR廣告扮碇源堂；剛剛又幫金管局拍宣傳片，扮莎士比亞叫年青人唔好亂借錢；蕭定一仲請佢客串《紀念日》，演麻煩大老闆。咁出位，到底大學會唔會有微言？「我哋做咩都有上報㗎，最緊要做到knowledge transfer，希望可以盡我綿力用廣東話為其他人創造到價值。」搞笑背後，Ben Sir其實對廣東話好有抱負同理想。當年讀博士時，佢要喺研究英文同中文之間做選擇，雖然佢係英文系出身，又明知研究英文一定更易搵工，「但我唔想只係為份工，我真係想研究自己母語。」所以我哋依家先有得睇Ben Sir教中文。咁除咗因為廣東話係母語，廣東話最吸引最有趣係咩？「最有趣係我講到佢有趣，哈哈。廣東話粗口係靈活有趣，普通話無字代表男性器官，廣東話有3個，呢下已經3比0，勁過車路士贏波。」希望車仔fans唔好嬲，比喻咋。
漆黑中嘅螢火蟲
除咗粗口，最常喺Ben Sir身上出現嘅應該係周星馳，之前佢喺《學是學非》扮過，《Ben Sir學堂》最尾出credit時，佢又會背星爺對白。「無無聊聊等埋位時會扮，佢哋覺得幾好笑咪加落去，我唔識扮其他人，劉華嗰啲太型嘞。」最熟當然係《食神》、《國產凌凌漆》、《審死官》、《西遊記》，「咩漆黑中嘅瑩火蟲呀嗰啲，星爺引我哋笑十幾廿年，當致敬下。其實佢啲笑位好生活化，比許冠文更貼近生活、更小市民，周星馳最好笑嘅笑位，都無屎尿屁無性，咁都引到人笑，係難嘅。」好多人一向都以背星爺對白為樂，事實上我都係，但諗諗下咁多年，我哋都仲係睇星爺先識笑，係有少少傷感，原來香港笑匠，後繼無人。「做悲劇比較易，好似《唐山大地震》，呢五個字聽到都眼濕濕，但引人笑好難。肥姐走咗之後都咩人，志偉年紀都大，佢都撐咗獎門人都好多年。子華囉，另外農夫都唔錯，同Do姐一齊幾搞笑。」既然Ben Sir想引大家笑，又想為廣東話創造價值，不如試下做棟篤笑，趁旺嘛，「發夢時有諗過搞笑，但人老咗口齒無咁好，我唔會主動，我哋係被動不抗拒。」OK明嘅，大家都明啦係嘛？
用廣東話寫租約？
對人講人話，對鬼講鬼話，Ben Sir都會講下粗口，有時自己一個人都會講，因為粗口喺唔同場合，可以有唔同用法，「好似我同你講解粗口時又可以講，又可能係鬧你或者恭喜你，好多用法嘅。」有人覺得粗口好dirty好難聽，講完會打冷震，但世界上比粗口難聽嘅嘢其實好多，「例給網民讚我，我有時唔識反應，你講句粗口我都識『or』咁呀，哈哈。其實虛偽嘅嘢就難聽過粗口。」廣東話近年好弱勢，要靠粗口先可以發到少少圍，Ben Sir身體力行支持廣東話，例如佢提倡將廣東話寫入正規文件，又係用自己做實驗，「我同租客寫租約係用廣東話，律師話OK，幾過癮。」我諗起《九品芝麻官》契仔契爺嗰段，但事實用廣東話買賣樓宇，寫得清楚就應該無問題。另外Ben Sir又叫大學生用廣東話去考DSE作文，「中學生唔好試呀！」如果零分、滿分、有無扣分，都係一件新聞，「起碼知道到底用廣東話得唔得。」
你唔一定要祟拜把刀
Ben Sir主張要增加廣東話經濟效益，要活化，日常生活都要用，錯字正字都可以暫時不理，救「字」最緊要。「我唔會好執著正字先，學英文都唔係要識晒所有英文生字啦。好似『咧啡』，如果我唔識寫，可唔可以用住其他字先？『啲』字都有兩個（另一個為「尐」），無話邊個錯，文字唔係數理化一加一咁睇。」廣東話空間愈嚟愈變窄，教育局同學校當然有責任，整咩無啦啦要用普通話學中文？有啲學校連小息都要小朋友講普通話，係咪有少少over。「學其他語言就好似你帶多把刀，唔一定要崇拜把刀，用完佢切嘢你咪放低。同大陸人做完生意，講完咪算，唔使返嚟香港落街買嘢坐的士，日常生活都用啩。」話說Ben Sir其實好有學者風骨，有時喺Facebook都會就時事發表下意見，唔會話人紅就收聲。訪問最後，佢提到自己雨傘運動時都上過大台講過3次嘢，2014年後又無過大陸，「廢事啦我心靈好脆弱，一陣扑到我個頭，世界咁多地方去。」你之後去泰國都要小心呀！
Text…iris
photo…Oscar
（原文刊於#1115期《東TOUCH》）
