為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit

20個上過《TOUCH》的明星們

一寸光陰一寸金,要知道2015是為《TOUCH》20周年的大喜日子。廿年走過,《TOUCH》能夠於今時今日仍然站得企腳,除了各大TOUCHers的努力外,其實各界朋友的鼎力支持亦不得不提,是以今回我們TOUCH網上特別編集便找來20位曾經出現過於我們雜誌之上的名人、明星朋友們,一炮過為你公開他們回到未紅時的珍貴編集。講多無謂,就讓我們一起回顧這趟廿年的心跳回憶。

 

01. 張柏芝

根據非正式統計,張柏芝理應是《TOUCH》歷年來最被看重的一位女明星。從出道之初以平地一聲雷之姿彈起,到後來每隔三五七期便登上封面就大概知道當時的她到底有幾厲害有幾紅。甚至乎呢期《TOUCH》仲講到明當時最得令的GiGi都要小心戒備喎。不過想當初嘅張柏芝,又真係任何天氣都無得頂嘅。

 

02. 陳小春

廿年歷史成功目睹香港回歸,原來當年今日《TOUCH》甚至曾經以特別編集教你點拎特區護照喎。教你拎護照唔出奇,出奇在原來陳小春愛國之心想當年已經昭然若揭,除了教學相長之外,小春甚至乎仲同埋我哋編集部同事走去灣仔政府合署遞form申請,其對祖國的一片丹心早就值得表揚,希望佢今日仲係用緊。

 

03.  吳彥祖

吳彥祖由出道至今一直予人男神形象,但原來佢本尊剛剛出道之時亦都玩得夠顛夠喪。以《美少年之戀》進軍香港影壇,吳生就係呢期親身剖白自己的性向取態,同時又上晒身咁大耍少林功夫,唔知道今時今日仔都生埋又進軍荷里活嘅吳生又肯唔肯做多次呢?

 

04. 陳奕迅

香港樂壇從來都是長江後浪推前浪,新人輩出的同時很多舊人也無聲無息的消失。不過這廿年樂壇之中唯一的特例大概要數陳奕迅,當年被冠以新人王之名,又被評以「3個月內過硬蘇永康」,而事實證明這個世界實在有麝自然香,不過最想回顧嘅都係Eason呢個爆炸頭滑水look喎。

 

05. 陳冠希

陳冠希一向都是《TOUCH》常客,不過在JUICE與CLOT正式成軍之前,Edison於《TOUCH》上的身分從來都係當時得令的重量級偶像派明星。曾被《TOUCH》編集部選為年度型男之首,但當時阿陳生的潮流味度就未有咁濃,當時《TOUCH》為 香港漫畫節推出的特別編集便曾找來他本尊客串介紹,又GRAFFITI又踩板,好hip hop喎喂。

 

06. 梁詠琪

梁詠琪當年真係紅到發紫,所以搵書期間見到每隔兩期封面又係佢真係覺得好amazing。又真係唔到你唔服,想當年GiGi的清新形象、高佻的身型的確殺晒老中青三路人馬,唔使刻意賣弄就自然係咁成為封面女郎,係勁嘅。

 

07. 何韻詩

近年終於輪到盧巧音被人認錯係何韻詩,不過喺阿詩出道之初,包括小弟在內的許多人都曾經以為何韻詩係盧巧音個妹。無他的,兩者無論歌路、風格其實都有點相同,所以當年何韻詩上《TOUCH》條大題都寫明「影子盧巧音」,但時間證明原來何韻詩同盧巧音原來真係兩個人嚟的。ps.我仲好鍾意《垃圾》

 

08. 林峰

峰哥呢家興着Rick Owens,不過想當年林峰出道原來已經被評為「翻版古天樂」。唔講又唔知,原來林生曾經係出道之前接受過6年歌唱比賽,又講到明唱歌一定好過古仔添。我知林峰係藝名,但點解真名不願透露嘅,今時今日有人知道佢真名未?

 

09. 林熙蕾

《TOUCH》其實都影過幾多過江龍,其中一個最唔講得笑嘅應該就係林熙蕾。雖然今時今日已經收心養性,不過當年林熙蕾的小背心、露臍裝加埋裙擺搖搖的確殺死唔少人,而且當年更輯錄4級動作大上位添喎,事實證明又係work啦。 

 

10.  羅志祥

又一位上過《TOUCH》的台灣明星,講緊就係現在的亞洲舞王羅志祥。當年以組合「羅密歐」襲港未見成功,不過當年《TOUCH》便曾將這個二人組合形容為台灣Kinki Kids,當年日系走向反差今日的韓式舞王,真係前塵往事不堪回首

 

11. 羅蘭

羅蘭姐扮鬼扮馬原來唔係第一日嘅事,早係十幾年前羅蘭姐便曾以「哈利」打扮現身《TOUCH》。雖然當年羅蘭姐扮「龍婆」早已扮得出神入化,不過估唔到扮起鐵騎女漢亦一樣形神俱備,個人嚟講真心覺得仲型過聖羅蘭個look,真心型到裂。

 

12.  李思捷

李思捷覺得自己好笑原來有原因,想當年以《喜劇之王》上位(其實小弟只記得張柏芝),《TOUCH》便順理成章找來田雞、林子善、如花、甜筒輝等一眾人馬訪問,但勢估唔到原來李思捷都是其中一份子添。李生就係訪問話自己自小去咗加拿大所以廣東話唔係幾好喎,所以你啲笑話到今日都唔好笑嘅,我原諒你啦。

 

13. NIGO

作為立足香港的潮流雜誌,《TOUCH》除了找來不同明星訪問之外,亦致力發掘最新日本潮流予香港讀者。所以在當年葛爺於香港成立Busy Workshop之際,我們便率先找來BAPE的NIGO作一回深度訪問,唔唔見阿NIGO好似中學生咁嘅樣就無乜料,當年佢就話過「香港,好似得COPY文化」,一語中的嚟講到今時今日仍然apply到喎。

 

14. 徐天佑

邊個係徐文健?睇樣你咪知係啱啱結完婚嘅天知囉。想當年憑住維他檸檬茶廣告及翻版城城之名出道,天佑當年的一臉稚氣其實與今天仍然無乜分別。

 

15. 謝霆鋒

謝霆鋒今時今日已經升上神枱,但當年的霆鋒其實原來一樣都係潮流指標。話說繼一對成龍版Reebok Pump Fury之後,謝霆鋒成為第二位與Reebok聯名的香港明星,其推出過的便是一款名為Trailzilla DMX的波鞋,其紅加黃的配色夠搶眼之餘亦都全球限量3,000對,我諗今時今日搵得返都應該已經碎晒。

 

16. 丁子高

已經與楊千嬅成家立室的丁生曾經是為VRF的一份子,出道之初已經與SMAP相提並論,雖然至今仍然記得曲目僅有「寒冰掌 又推甩兩件」,不過丁子高至今仍然活躍於香港娛樂圈,至於其餘3人則已經人間蒸發。

 

17.  楊恭如

憑着《風雲之雄霸天下》紅透半邊天,楊恭如要靚可以靚,要性感可以性感實在無得輸。當年的紅唇咬手指pose已經能夠俘虜萬千少男的心,加上背心熱褲的90s styling,撇除妝容來說其他已經有夠美不勝收,僅此係到多謝返金成先。

 

18. 全智賢

紅遍亞洲的全智賢真名叫王智賢你知唔知?佢又做過Leon嘅第8代阿May你又知唔知?唔知唔緊要,事關我都係啱啱先知,事關原來這位在充當野蠻女友和外星人妻之前,全智賢已經上過《TOUCH》喇播,佢清純嘅外貌、靦腆的表情真心唔講得笑呀。

 

19.  楊千嬅

作為90s的最佳代表,楊千嬅自然也是《TOUCH》的常見嘉賓。雖然經常見得到,但好似呢期造型咁出眾又真係唔係成日有,孖辮妹造型真心覺得又幾襯丁太佢,今日時今日若果佢本尊成頭紫髮復刻呢個造型又唔知有無睇頭呢?

 

20. 陳曉東

與梁詠琪曾被譽為天生一對,90年代也是陳曉東紅到發紫的年代。東東當年一向走鄰家男孩的清新路線,係未在《結他》年代變身不羈少年之前,《TOUCH》便曾找他以寶麗來自拍一系列寫真。雖則呢輯寫真年代係有啲久遠,不過時至今日睇返仍然唔覺得老套,唔知到底係東東個樣定係寶麗來可以抗衰老呢?


Tag : 20thanniversarystartouch